Ж.ГАНБААТАР САЙД “ШАТАХУУН ХОМСДСОН НЬ МИНИЙ БУРУУ БИШ” ГЭЖЭЭ

      АИ-92, дизель түлш хомстож, малчид явгарч, хүүхдүүд хичээлдээ явж чадахгүйд хүрээд байна. Харин нийслэлчүүд өнгөрсөн баасан гарагаас хойш шатахуун хайж, бүтэн өдөржин, шөнөжин дугаарлаж байж балга шатахуунтай болж байна. Зарим нь хэчнээн дугаарлаж, шатахуун хайгаад ч ажилдаа явах шатахуунтай болж чадаагүй хэмээн гомдоллож байгаа аж. Манай улс жил бүрийн хавар, намар шатахууны хомстолд орж, монголчууд хэдэн өдрөөр шатахуун түгээх станцын ойролцоо дугаарлаж, зарим нь шатахуун хайхаас залхаж, нийтийн унаагаар зорчиж байж шатахуунтай залгадаг. Харин энэ жил дөн өвлийн хүйтнээр шатахуун хомстож, хот, хөдөөгүй явгарч байна. Ялангуяа зудтай аймаг, сумдын малчид хөл дүүжлэх унаагүй явгарч, ихээхэн зутарч байгаа.  Мөн шатахуун хомстсоны улмаас баруун аймгуудын автобус хуваарийн дагуу явж чадахгүйд хүрчээ. Монголчуудын амьдрал шатахуунаас болж бүрэн зогссон байдалтай байна. Харин шатахуун яагаад хомстсон, шатахуун хомстохгүй байх тал дээр цаашид хэрхэн анхаарах талаар албаныхан тодорхой хариулт өгч чаддаггүй хэвээр байна.

      Тухайлбал, шатахуун хомстсон талаар АМГТГ-ын дарга Л.Баярмандах “ОХУ-ын дотоод асуудалтай холбоотойгоор шатахууны хомстолд орсон. Үүнээс гадна манай улс шатахуун хадгалах сав муутай учраас нөөцөө бүрэн авч чаддаггүй” хэмээсэн байдаг. Харин Уул уурхай, хүнд үйлдвэрийн сайд Ж.Ганбаатар “Надаас шатахуун ургадаггүй учраас шатахуун хомстсон нь миний буруу биш” гэж хэлсэн нь бий. 

Д.ОТГОНБАЯР: ЗАМЫН-ҮҮДИЙН БООМТООР 89 ВОГАН ШАТАХУУН ОРЖ ИРСЭН

      Харин өчигдөр Замын-Үүдийн боомтоор шатахуун орж ирсэн. Шатахууны хомстолгүй болно гэх мэдээлэл гарсан. Энэ талаар Замын-Үүд сумын Засаг даргын орлогч Д.Отгонбаяраас тодрууллаа. Тэрбээр “Энэ сарын 8-нд 44 вагон түлш орж ирсэн. Харин энэ сарын 9-нд 45 вагон түлш орж ирснийг шилжүүлэн ачиж байгаа. Нэг вагонд дунджаар 60 тонн түлш багтдаг. Энэ долоо хоногт шатахуун орж ирсэн учир иргэдийн ажил, амьдрал хэвийн үргэлжилэх байх” гэв. Тогтмол үйл ажиллагаа явуулдаг шатахуун түгээх станцууд шатахууны нөөцтэй мөртлөө иргэдэд түгээхгүй байна гэх гомдол олон нийтийн сүлжээгээр цацагдсан. Шатахуун өгч байгаа зарим станцууд 30 мянган төгрөгт олгож байгаа нь зохион байгуулалттай хэмээн иргэд хардаж байна.