Нүүрсний Хянан шалгах түр хорооны сонсгол гурав дахь өдрөө үргэлжилж байна. Өнөөдрийн сонсголоор "Эрдэнэс Тавантолгой" ХК-ийн танилцуулга болон худалдан авалттай холбоотой зарим асуудлыг хэлэлцэхээр шинжээч дүгнэлтээ танилцууллаа. Энэ үеэр "Эрдэнэс Тавантолгой" ХК-ийн анхны захирал Б.Энэбиш гэрчээр ирж тайлбар өгсөн юм.

ТҮР ХОРООНЫ ДАРГА Б.ЭНХБАЯР: Таныг хилээр гарч зугтаасан. Оргон зайлсан гэх асуудал яригдаж байсан. Хэрэг нь юу болсон бэ.

"ЭРДЭНЭС ТАВАНТОЛГОЙ" ХК-ИЙН АНХНЫ ГҮЙЦЭТГЭХ ЗАХИРАЛ АСАН Б.ЭНЭБИШ:    Намайг ажлаа өгсний дараагаас улс төрийн нам солигдоход нөгөөхөө харлуулдаг дэг үйлчилж эхэлсэн. 2008 оны УИХ-ын сонгуульд МАН, АН хоёр өрсөлдөхдөө нэг нь нийт иргэдэд 1.5 сая төгрөг бэлнээр, нөгөө нь нэг сая төгрөгтэй тэнцэх хувьцаа олгоно гэдэг амлалттай ороод УИХ, Засгийн газрын төвшинд энэ хоёр ордыг эхлүүлье гээд тогтоол, шийдвэр гарч, тухайн ажлыг хариуцаж байсан хүмүүсийн мөрөн дээр буусан. Үүний төлөө л би ажилласан. УИХ, Засгийн газрын тогтоол шийдвэрийн хүрээнд би ажилласан. Энэ бүх ажлыг миний удирдсан хамт олон сайн ажилласан. Тухайн үед Хүний хөгжлийн санд 400 орчим тэрбум төгрөг төвлөрүүлсэн. Бид компанийн хувьд хувь нийлүүлэгчийн үүргээ сайн биелүүлсэн. Ингээд 2013 оноос над руу асуудал чиглэсэн. Чалькогийн гэрээг буруу ойлгосон, гуйвуулсан хүмүүс байдаг. Улстөрчид ч байсан. Мөн Хятдаас 60 тоннын 10 автомашин авсан тэр нь эвдэрсэн яагаад худалдан авалт хийсэн бэ гэдэг асуудлыг ярьсан. Түүнчлэн хүнд даачин машины буруу дугуй авсан гэдэг гурван асуудлаар АТГ-т шалгасан юм билээ. Намайг бол хэлмэгдүүлсэн. Дээр нь намайг өөрөө тайлбарлах боломж олгоогүй. Би төлөвлөгөөгөө биелүүлэх гэж л тэр 10 машиныг авсан. Дугуйнуудыг нь ашиглаад дууссан. Монголын уул уурхайн том төслүүдийг эхлүүлснийхээ төлөө хэлс хэрэгт гүтгэгдсэн. Австралид охины төрүүлчихээд 6-7 сарын дараа ирэх гэсээр байтал намайг хэлмэгдүүлсэн.. Тэр үед шударга бусын хонгил байгуулагдсан гэж ярьдаг байх аа. Намайг тэр хонгил руу чирэх гээд байсан. Би оргон зайлсан зүйлгүй. Би өөрөө хуульч мэргэжилтэй хүн. Шударга бусын хонгил руу чирчих гээд байсан учраас гадаадад хэдэн жил амьдарсан. Монгодоо ирээд гурван жил болж байна.