Нүүрсний Хянан шалгах түр хорооны сонсгол гурав дахь өдрөө үргэлжилж байна. Өнөөдрийн сонсголоор "Эрдэнэс Тавантолгой" ХК-ийн танилцуулга болон худалдан авалттай холбоотой зарим асуудлыг хэлэлцэхээр шинжээч дүгнэлтээ танилцууллаа.

    "ЭРДЭНЭС ТАВАНТОЛГОЙ" ХК-ИЙН АНХНЫ ГҮЙЦЭТГЭХ ЗАХИРАЛ АСАН Б.ЭНЭБИШ: Би тус компанийн анхны захирал. Бүх юмаа ярих боломж одлоо. Би "Эрдэнэс Монгол" компанийн болон "Эрдэнэс Тавантолгой" ХК-ийн захирлаар нийт таван жил ажиллаж байсан. Миний хувьд Монголын уул уурхайн хоёр том төсөл болох Оюутолгой, Тавантолгой төслийг удирдаж  явсан.Тавантолгой ордыг эдийн засгийн эргэлтэд оруулахдаа "Эрдэнэс MGL" байхад нь бага олборлолтын төлөвлөгөө гаргаж, ТЭЗҮ-г боловсруулах гэж байсан. Гэтэл Засгийн газрын шийдвэрээр Баруун цанхийн орд дээр стратегийн хөрөнгө оруулалт хийнэ. Зүүн цанхи дээр "Эрдэнэс Тавантолгой" гэдэг охин компани байгуулна гэсэн. Ингээд Хүний хөгжлийн санд 312 тэрбум төгрөгийн хөрөнгө оруулах ёстой гэсэн үүрэг өгч байсан. Тодорхой удирдамжтай "Эрдэнэс Тавантолгой" ХК байгуулагдсан гэсэн үг. Ингээд тендер зарлаж, уул уурхайн техник хэрэгсэл авч 2010 оноос хөрс хуулалтын ажлаа эхлүүлсэн. 2011 оноос нүүрсээ гаргахад бэлэн болж байгаа. Ингээд БНХАУ-ын Чалько компанитай гэрээ хийж, нүүрсний урьдчилгаа төлбөр авч байлаа.

    Гэрээний үндсэн дээр 250 сая ам.долларыг жилийн гурван хувийн хүүтэйгээр урьдчилгаа төлбөр болгон авсан.  Нэмээд 100 сая ам.долларыг 5-7 хувийн хүүтэй авсан. Хүний хөгжлийн санд маш их мөнгө төвлөрүүлэх байсан учраас энэ мөнгийг авсан. Түүнчлэн Австрали болон Германы хамтарсан компанитай гэрээ байгуулсан. Гэрээ ёсоор Монголд охин компани байгуулж байлаа. Үндсэн ажил гүйцэтгэх олон улсын компани гэсэн үг. Манай ажилтнууд Баруун биш Зүүн цанхи дээр ажиллах гэрээ хийсэн. Манай ашиглаж байсан тоног төхөөрөмжийг шилжүүлж өгөхөөс арга байгаагүй.

"Эрдэнэс Тавантолгой" ХК-ийн нөөцийг УИХ дээр өндөр тавьж, бидэнд боломжгүй хүлээлт үүсгэдэг байсан. Засгийн газрын шийдвэрээр иргэдэд сар бүр олгох 2100 төгрөг, ахмадад сар бүр олгох 500 мянга, хөгжлийн бэрхшээлтэй иргэдэд олгох тэтгэмжийн сонгуулийн амлалтыг бид биелүүлэх хатуу даалгавар авсан. Нүүрсний олборлолт тасалдуулж болохгүй учраас тоног төхөөрөмжөө сул зогсолтод байлгаагүй. Мөн Чалькотой гэрээ байгуулсан гэрээг төлөх шаардлагатай байсан.