УИХ-ын Хянан шалгах түр хорооноос хийж буй нүүрсний сонсгол хоёр дахь өдрөө үргэлжилж байна. Нүүрсний сонсголд Ерөнхийлөгч асан Ц.Элбэгдорж, Ерөнхий прокурор асан Д.Дорлигжав нарыг гэрчээр дуудсан. Тэгвэл Ерөнхийлөгч асан Ц.Элбэгдорж гаднын улсад байгаа гэх шалтгаанаар ирэх боломжгүй гэжээ. Улмаар Ерөнхий прокурор асан Д.Дорлигжав мэдүүлэг өгч байна. Шинжээчийн дүгнэлтээр 2013 онд “Тавантолгой”-гоос 100,000 тонн нүүрс борлуулсан “Женералтек” ХХК-ийн нэгдмэл ашиг сонирхолтой этгээд гэж үзжээ.“Женералтек” ХХК-ийн эцсийн өмчлөгч Х.Болдбаатар нь Ерөнхийлөгч асан Ц.Элбэгдоржийн эхнэрийн дүүгийн компани юм байна. Харин тус компанийн гүйцэтгэх захирал Б.Батболд нь Х.Болдбаатарын хүү бөгөөд Д.Баатартай "Глобал аппарел лимитед" компанийг хамтран эзэмшдэг аж. Харин Д.Баатар нь Д.Дорлигжавын төрсөн дүү юм байна. Ийм нэгдмэл сонирхолын зөрчилтэй юм байна. Улмаар "Женералтек" компани 2013 онд 100 мянган тонн нүүрс нийлүүлэх гэрээ байгуулсан. Гэвч 19.2 мянган тонн нүүрс нийлүүлсэн гэж бүртгэгдсэн байна.

УИХ-ЫН ГИШҮҮН О.ЦОГТГЭРЭЛ: Ерөнхий прокуророор ажиллаж байсан Д.Дорлигжавын дээрэмдэж авсан газар дээр барилга барьсан хэмээн Б.Энхбаяр сайд хэлсэн. Ингэхдээ Д.Дорлигжав гэдэг хүн Т.Энхболдсодон гэдэг хүний газрыг булаан авч, О.Цогтгэрэлд шилжүүлсэн гэсэн. Та Т.Энхболдсодон гэдэг хүний газрыг дээрэмдэж авсан юм уу.

Д.ДОРЛИГЖАВ: Би 2010-2015 онд Улсын ерөнхий прокуророор ажилласан. Өнгөрсөн сонгуулийн үеэр ч тийм зүйл ярьж байсан. УИХ-ын чуулганы хуралдаан дээр Хууль зүйн сайд тэгж ярьж байна лээ. Үүнийгээ сайн нягтлаж байх хэрэгтэй шүү. Хүний нэр төрд халдаж болохгүй. Иймэрхүү цахим орчинд явж байгаа зүйлсийг нягтлахгүй ярьж болохгүй. Үүндээ уучлалт гуйгаарай.