УИХ-ын Хянан шалгах түр хорооноос нүүрсний сонсголыг зохион байгуулж байна. Энэ үеэр Өмнөговь аймгийн Ханбогд сумын Засаг дарга Х.Нэхийт, Ш.Эрдэнэжаргал нар 40 гадаадын аж ахуйн нэгж, иргэнд Гаалийн хяналтын бүс, авто зогсоол байгуулах нэрийдлээр газар эзэмшүүлэхээр өгсөн байж болзошгүй баримт дэлгэгдээд байна. Монгол Улсын Үндсэн хууль болон Газрын тухай хуульд Монгол Улсад гадны иргэн газар ашиглаж болох ч өмчилөх, эзэмших эрхгүй гэж заасан байдаг. Энэ нь Үндэсний аюулгүй байдалд нөлөөлж болзошгүй гэх асуудлыг хөндөөд байна.

      Тэгвэл Ханбогд сумын Засаг дарга Х.Нэхийт гэж хэн бэ гэдгийг танилцуулж байна. 

     Хургаагийн Нэхийт нь 2020 оны арванхоёрдугаар сараас Өмнөговь аймгийн Ханбогд сумын Засаг даргаар томлогдон ажиллаж байгаа юм. 1971 онд төрсөн Ханбогд сумн ИТХ-д сонгогдон ажиллаж байжээ. Тэрбээр аймгийн алдарт уяач цолтой юм байна. 

     Хуулийн байгууллагаас Өмнөговь аймгийн Ханбогд суманд 2021 онд гүйцтэгэх ажиллагаа явуулахад Засаг дарга Х.Нэхийт тэргүүтэй албан тушаалтнуудын албан өрөө болон гэрт нь нэгжлэг хийсэн. Нэгжлэгээр Х.Нэхийтийн гэрээс их хэмжээний валют, 13 кг алт гарч, хурааж авсан гэх мэдээлэл гарч байв. Улмаар Өмнөговь аймгийн ИТХ-ын дарга Б.Бадраа, түүний хүү Б.Наранболд, эхнэр Б.Сайханжаргал, Ханбогд сумын Засаг дарга Х.Нэхийт болон тус сумын холбогдох албан тушаалтнууд Цагаан хад суурьшлын бүсэд хууль бусаар газар авч, БНХАУ-ын иргэдэд өндөр үнээр худалдсан гэх асуудал ч 2021 онд сөхөгдөж байлаа.  Энэ талаараа тэрбээр тухайн үед манай сайтын сэтгүүлчид мэдээлэл өгөхдөө “Гэр болон албан өрөөнд нэгжлэг хийж, хууль хяналтын байгууллагаас шалгаж байгаа нь үнэн. Манайх дэлгүүр ажиллуулдаг.  Гэр, дэлгүүрээс 13 сая төгрөг хураан авч, эх үүсвэр тодорхойлохоор аваад явсан. Дэлгүүртээ зарахаар авчирсан найман ширхэг мөнгөн аяга, үйлдвэрийн мөнгө аяга, гар хийцийн гурван ширхэг аягыг эх сурвалжийг батлахаар хураан авсан нь үнэн. Мөн албан ширээний нүдэнд байсан 860 мянган төгрөгийг авч явсан” болсон нөхцөл байдлынхаа талаар тайлбар өгч байсан юм.

     Х.Нэхийтийн 2022 оны хөрөнгө оруулалтын мэдүүлгийг танилцуулахад

• Жилийн орлого нь 290 сая төгрөг,
• Гэр бүлийн гишүүд нь 97 сая төгрөгийн орлоготой,
• 218 сая төгрөгийн үнэлгээ бүхий хоёр орон сууцтай,

• 242 сая төгрөгийн үнэлгээ бүхий таван автомашинтай,
• 629 сая төгрөгийн малтай,
• 120 сая төгрөгөөр үнэлсэн эзэмших, өмчлөх эрхтэй гурван байршилд газартай,
• 469 сая төгрөгийн хадгаламжтай,
• Говь Гурван Чулуу ХХК, Ханбогд тээвэр ложистик ХХК-иудад хувь эзэмшдэг хэмээн мэдүүлжээ.