Чуулганы нэгдсэн хуралдаанд Ерөнхий сайд оролцож, үг хэллээ.  Шүүх байгуулах тухай хуулийн шинэчилсэн найруулгын төсөл болон хамт өргөн мэдүүлсэн хуулийн төсөлтэй холбоотой үг хэлж байгаа юм.

Ерөнхий сайд Л.Оюун-Эрдэнэ "Манай Засгийн газар байгуулагдсан цагаасаа өнгөрсөн 30 жилийн хугацаанд үнэлэлт дүгнэлт өгч, шинэ 30 жилийг эхлүүлэх ажлын үндэсийг тавьж байна. Эхний жил цар тахлыг давахад дараагийн жил нь авлигатай тэмцэхэд бүх зүйлээ зориуллаа.  21 аймгаар ард түмэнтэйгээ уулзаж, ярилцсан. Авлигын голомтыг таслахгүйгээр шинэ 30 жилийг цогцлоох боломжгүй гэдгийг иргэд хэлж байна. Өмч хувьчлал, газрын наймаа зэрэг нь өнөөдрийн бухимдалд хүргэж, тэгш бус байдлыг бий болгосон гэдгийг хэлсэн. Авлига нь ард иргэдийг шударгаар ажиллаж хөдөлмөрсөн 30 жилийг үгүй хийсэн гэсэн. 30 жилийн авлигын тогтолцоо гурав хүрэхгүй жилийн хугацаанд арилахгүй ч, авлигыг үл тэвчих үзэл санаа бүрэлдэн байгаад баяртай байна. 

Амжилтаасаа илүү алдаагаа засах нь үнэт зүйл юм. Авлигын эсрэг тэмцэл адармаатай ч шүүхийн шатанд хүрээд байна. "Сонгууль хүртэл тэсчихвэл Л.Оюун-Эрдэнэ зайлчихна, бүх зүйл сайхан болно" гэж хилийн чандад оргон зайлсан "шувууд" томилсон шүүгч нартаа захиж байгаа ч би мэдэж байна. Үүнийг зөвхсөн ордон дотор бус иргэд ч мэдсэн байна лээ. Авлигын эсрэг тэмцэл өгөөжөө өгч далд эдийн засаг ил гарч байна. Бондуудын өрийг төлж, төлбөрийн тэнцэл анх удаа эерэг үзүүлэлтэй гарлаа. Өр тавьж улсаа дампууруулчихаад "Өргүй монгол" гэж хэлбэрдэх, шудрага ёс ярьчихаад авлигын бүлэглэл болж санхүүжүүлэгч нарыг иргэд ялгаж байгаа.

Авлигачидтай тэмцэх тэмцэл шүүхийн шатанд удааширч байна. Шүүх засаглалыг бид  авлигач шүүгчдээс нь, тэдний тавьсан бүлэглэлээс нь хамгаалж, хараат бус шүүх засаглалыг бэхжүүлэхэд дэмжлэг үзүүлэх цаг болсон байна. Улсад 20 тэрбум төгрөгийн хохирол учруулсан авлигачийг 20 сая төгрөгөөр торгож байгаа нь авлигын эсрэг хийх тэмцэл үү, урамшуулал уу гэдгийг ялгаж, салгах хэрэгтэй байна.

  Энэ асуудлыг парламент шийдэх цаг болжээ. Авлигын асуудал шүүхийн шатанд замхарсаар байвал ард иргэд тэсрэхэд бэлэн байна. Авлига албан тушаалын хэрэгт холбогдсон нэгнийг өршөөж, магадлангаар сулладаг эрх зүйн орчинг өөрчилсөн" гэлээ.