Хууль зүйн сайд Ж.Энхбаяр нүүрсний сонсгол зохион байгуулах талаар мэдээлэл өглөө.  

    Тэрбээр “Нүүрсний хэргийг хянан шалгах УИХ-ын Түр хороо хуралдаж, нээлттэй сонсгол хийх тов тогтоож, холбогдох гэрчээр дуудах Түр хорооны тогтоол баталсан байгаа. Нээлттэй сонсголыг хоёр үе шаттай хийхээр шийдвэрлэлээ.

         Эхний сонсголыг 2023 оны арванхоёрдугаар сарын 4-8-нд зохион байгуулна. Ингэхдээ дараах дөрвөн мэдээллийг сонсож, холбогдох гэрчийг дуудна.

• "Тавантолгой" ХК нүүрс олборлолт, борлуулалт, тээвэрлэлт, экспортын үйл ажиллагаа болон бусад бараа ажил үйлчилгээ, худалдан авалтын үйл ажиллагаа,
• "Тавантолгой" ХК-ийн эрх бүхий байгууллагаас хийсэн хяналт шалгалт, тэдгээрийн үр дүнд авсан арга хэмжээ,
• “Эрдэнэс Тавантолгой” ХК-ийн үүсгэн байгуулагдсанаас хойших үйл ажиллагаа, санхүүгийн мэдээлэл
• “Эрдэнэс Тавантолгой” ХК-ийн бараа, үйлчилгээ, худалдан авалтын үйл ажиллагаа, 2011-2023 оны аравдугаар сарын гэрээт олборлогч компаниуд болон бусад бараа үйлчилгээ, худалдаа авалтын үйл ажиллагаа зэргийг сонсож хэлэлцэхээр шийдвэрлэлээ.

Хоёр дахь сонсголыг 2023 оны арванхоёрдугаар сарын 18-22-нд зохион байгуулна. Тус сонсголоор,

• “Эрдэнэс Тавантолгой” ХК-ийн нийт борлуулалт, экспортын үйл ажиллагаа, тээвэрлэлтийн үйл ажиллагаа, охин болон хараат компанид оруулсан хөрөнгө оруулалтын үйл ажиллагаа, тэдгээрийн хэрэгжилт
•  “Эрдэнэс Тавантолгой” үйл ажиллагааны санхүүжүүлсэн бусад төсөл, “Эрдэнэс Тавантолгой” ХК-д эрх бүхий байгууллагаас хийсэн хяналт шалгалтууд, тэдгээрийн үр дүнд авсан арга хэмжээ, хяналт шалгалтаар илэрсэн бусад асуулт гэх зургаан асуудлын хүрээнд зохион байгуулахаар шийдвэрлэлээ” гэв.