Засгийн газрын хурАлдаанаар Шүүх байгууллага байгуулах тухай хуулийн төслийг хэлэлцүүлжээ. Энэ талаар Хууль зүй, дотоод хэргийн сайд Б.Энхбаяр "Үндсэн хуулийн 2019 оны өөрчлөлтөөр Монгол Улсын шүүхийг тойргийн журмаар байгуулж болно гэдэг заалт орсон. Шүүх байгуулахдаа Шүүхийн ерөнхий зөвлөл Монгол Улсын Дээд шүүхтэй зөвшилцсөн саналыг үндэслэж, Засгийн газар УИХ-д өргөн мэдүүлнэ гэж заасан байдаг. Шүүх эрх мэдэл хараат бус байх гурав дахь засаглал болж байгаа гэсэн үг. 

Хуулийн төсөлд нэгдүгээрт, Анхан шатны шүүх буюу хөдөө орон нутгуудад эрүүгийн болон иргэний хэргийн дагнасан шүүхүүд ажиллаж байгаа. Эдгээрийг нэгтгэж, нэг шүүх болгоно. Эрүүгийн болон иргэний хэргийн шүүх нэг танхимтай болно. Ингэснээр анхан шатны шүүхэд байгаа ерөнхий шүүгч нэг танхимтай болно. Дарга шүүгч болон Тамгын дарга нарын орон тоог багасгаж байгаа юм. Захиргааны зардал дээр гардаг асуудлыг шийдвэрлэнэ. 

Хоёрдугаарт, тойргийн давж заалдах шатны шүүхийн хүрээнд Орхон, Дархан-Уул аймагт байсан эрүү, иргэний хуулийн шүүхийг мөн нэгтгэнэ. Засгийн газар зөвшөөрлийн буюу хялбар шүүхийн асуудлыг оруулж ирсэн.

Гуравдугаарт, гэр бүл, хүүхдийн шүүхийг Монгол Улсад анх удаа байгуулах гэж байна. Энэ шүүхийг 2026 оны нэгдүгээр сарын 1-нээс ажиллуулах төлөвлөгөө гарсан. Ингэснээр шүүх байгууллагын зохиомол хэргийн 40 хувь шийдэгдэнэ гэж үзэж байна. Түүнчлэн авлига албан тушаалын хэрэг хоёр шатны шүүхээр явна. Анхан шатны шүүх авлига, албан тушаалын хэргийг шийдвэрлэхгүй байх зохицуулалт хийнэ. Улсын дээд шүүхийн Эрүүгийн танхим үүнийг өргөн бүрэлдэхүүнтэй хэлэлцүүлдэг байхаар тусгаж байна. Үүнийг Ерөнхий сайд өнөөдөр УИХ-д өргөн мэдүүлж, нэн яаралтай горимоор хэлэлцүүлэх үүрэг өглөө" гэлээ.