УИХ-ын чуулганы үдээс хойших нэгдсэн хуралдаан эхэллээ. Хуралдаанаар авлига, албан тушаалын гэмт хэрэгтэй тэмцэх чиглэлээр хууль, эрх зүйн орчныг боловсронгуй болгох шинэтгэлийн бодлогын талаар Ерөнхий сайдын мэдээллийг ХЗДХ-ийн сайд Б.Энхбаяр танилцуулж байна. 

УИХ-ЫН ГИШҮҮН Б.ПҮРЭВДОРЖ: Эрүүгийн хуулийн ялын бодлогыг чангарууллаа гээд авлигын эсрэг хууль батлаад авлига буурахгүй байна. Энэ нь дээд шатандаа хулгай нь тойгоо алдсантай холбоотой. Дээд шатны дарга нар нь идээд байхаар бид бас болно гэсэн ойлголттой болчихсон. Дээр нь төрийн алба хаагчид МАН ийм их муу нэр хүндтэй байгаа юм чинь сонгуульд ялагдах юм байна гээд байгаа дээрээ идэж, уугаад авъя гэдэг хандлага замбараагүй болсон. Авлига, хээл хахууль Монголын хөгжлийн хойш татаж байна. Ялын бодлогыг Их хурал хангалттай гаргаж өгсөн. Асуудал гаргасан хүмүүстээ хариуцлага тооц. Танай намынхан нэгэндээ барьцаалагдсан юм шиг чимээгүй байцгаах юм. 

ХУУЛЬ ЗҮЙ,  ДОТООД ХЭРГИЙН САЙД Б.ЭНХБАЯР: Гишүүний үгийг би асуулт биш санал гэж ойлголоо. Б.Пүрэвдорж гишүүн уг нь туршлагатай гишүүдийн нэг. Гэхдээ нам дотроо авлигачдадаа шахагддаг юм шиг байна лээ. Улс төрийн тэр, энэ нам гэхээс илүүтэй. Авлига бол Монгол Улсын зовлон болчихоод байна. МАН шүүмжлүүлээд ч гэсэн өөрсдийн авлигачдаа өөсрдөө шийдвэрлэсээр ирсэн. Үе хурдтай солигдож, сайн цаг наашлаж байгаа. Хөгжлийн банкны сонсголыг ярихад МАН 2019 онд Үндсэн хуульд өөрчлөлт оруулж, парламентын хяналтыг хийдэг Түр хороо байгуулах эрх зүйн үндсийг бүрдүүлсэн. Нүүрсний хулгайн сонсголыг тун удахгүй хийх гэж байна. Нүүрсний сонсголыг таслан зогсоох хийлгэхгүй байх санаархалд Ардчилсан нам битгий татан ороогдоорой.