Манайхан “Сахал” хочит Д.Эрдэнэбилэгийг батлан даалтад гаргаад, “алдчихсан”. Түүнийг албадан авчрах шүүхийн шийдвэр гараад гурван сар өнгөрлөө. Засгийн газрын хэрэгжүүлж буй “Шувуу” ажиллагаагаар ч, шүүхийн шийдвэрийн дагуу ч тэр “нисэж” ирсэнгүй. Үндсэндээ, Д.Эрдэнэбилэгийг өөрөө ирэхийг хүлээхээс өөр сонголтгүй болсон бололтой.

     Хэргийг тодруулбал, Дарханы төмөрлөгийн үйлдвэрийн концесс, "Эрдэнэт үйлдвэр" ТӨҮГ-ын хувьчлал, "Цемент шохой" ХК-д холбогдох хэргээр Д.Эрдэнэбилэгийг шалгаад багагүй хугацаа өнгөрсан. Түүнийг 30 хоног цагдан хорьж, эцэст нь эрүүл мэндийн шалтгаанаар батлан даалтад гарсан байдаг. Ингэхдээ хилээр гарахыг нь хориглож, зарим нэр бүхий хүнтэй уулзахыг хориглосон байсан юм. Харин Д.Эрдэнэбилэг өнгөрсөн хоёрдугаар сард хилийн хоригоо цуцлуулж, гурван тэрбум төгрөгийг барьцаанд үлдээгээд 14 хоногийн хугацаатай Сингапурт эмчлүүлэхээр явсан байдаг. Угтаа тэр хоёрдугаар сарын 23-нд эх орондоо эргэж ирэх байлаа. Хачирхалтай нь, тэр ирээгүй. Шүүх барьцаанд тавьсан гурван тэрбум төгрөгийг нь улсын орлого болгож, түүнийг албадан авчрах шийдвэрийг өнгөрсөн наймдугаар сард гаргасан юм.

Тодруулбал, Нийслэлийн прокурорын газраас Эрүүгийн хуулийн тусгай ангийн 22.1 дүгээр зүйлийн 1 дэх хэсэгт /Эрх мэдэл, албан тушаалын байдлаа урвуулан ашиглах/ заасан гэмт хэрэгт холбогдуулан яллагдагчаар татсан Д.Эрдэнэбилэгт урьд авсан гурван тэрбум төгрөгийн барьцааг улсын орлого болгон,  уг таслан сэргийлэх арга хэмжээг өөрчлөн цагдан хорих таслан сэргийлэх арга хэмжээ авхуулах тухай саналыг Сүхбаатар дүүргийн Эрүүгийн хэргийн анхан шатны шүүхэд ирүүлсэн байдаг.

Шүүхээс прокурорын саналыг 2023 оны наймдугаар сарын 18-нд хянан хэлэлцэж яллагдагч Д.Эрдэнэбилэгт урьд авсан гурван тэрбум төгрөгийн барьцааг улсын орлого болгож, Эрүүгийн хэрэг хянан шийдвэрлэх тухай хуулийн 14.9 дүгээр зүйлийн 1.4-т заасан үндэслэлээр Монгол Улсын хилээр орж ирсэн даруйд цагдан хорих таслан сэргийлэх арга хэмжээ авч шийдвэрлэсэн юм.

Гэтэл албадан авчрах шийдвэр гарч, гурван тэрбум төгрөг нь улсын орлого болчихоод байхад Д.Эрдэнэбилэг анир чимээгүй байна. Одоо бүүр Сингапуртаа байгаа эсэх нь ч эргэлзээтэй байна. Угтаа Засгийн газрын шувуу ажиллагаа хэрэгжиж байгаа бол Д.Эрдэнэбилэгийг энүүхэн ойрхон байх Сингапур руу нисэж очоод аваад ирэх байлаа.

Албадан авчрах шийдвэр гарч, гурван тэрбум төгрөг нь улсын орлого болчихоод байхад Д.Эрдэнэбилэг анир чимээгүй байна

Х.Нямбаатарын чадаагүй ажлыг Хууль зүй, дотоод хэргийн шинэ сайд Б.Энхбаяр чадах эсэх нь эргэлзээтэй байна. Угтаа түүний хэрэгжүүлэх эхний ажил нь авлига албан тушаалын хэрэгт холбогдож, хилээр гарч зугтсан этгээдүүдийг шувуу ажиллагаагаар шүүрч авчрах юм. Б.Энхбаяр сайд ажлаа аваад сар болсон ч ажлаа хийх нь тодорхойгүй байна. Д.Эрдэнэбилэгийг өөрөө ирэхийг хүлээвэл суудлын тань нас хүрэхгүй байх шүү, Б.Энхбаяр сайд аа...