Нийслэлийн Ардчилсан намын даргын сонгууль өнөөдөр болно. Сонгуульд нэр дэвшигчдийн бүртгэл өчигдөр дуусаж, гурван нэр дэвшигч албан ёсоор бүртгүүлсэн юм.  Тодруулбал, Ардчилсан намын гишүүн М.Тулгат, Т.Батцогт, Д.Бадарсан нар дэвшихээр бүртгүүлсэн.

    Нийслэлийн Ардчилсан намын даргад  Л.Гантөмөр Д.Бадарсанг, Х.Баттулгын талаас Т.Батцогтыг нэр дэвшүүлсэн бол М.Тулгат Ц.Элбэгдоржийн талаас дэвшиж байгаа гэх мэдээлэл бий. 

    Тэгвэл Л.Гантөмөрийн дэмжлэгтэй нэр дэвшигч Д.Бадарсанг нийслэлийн Ардчилсан намын даргад сонгогдох магадлал өндөр байгаа гэх яриа Ардчилсан намынхан дунд өрнөөд эхэлжээ. Д.Бадарсан нь НИТХ-ын хурлын төлөөлөгч бөгөөд АН-ын "Нэг Ардчилал" бүлгийн гишүүн гэдэг. Тиймдээ ч Л.Гантөмөр, Х.Тэмүжин нар түүнийг зүтгүүлж байгаа гэх нь бий. Ирэх сонгуульд нийслэлийн Ардчилсан намын хэр дэмжлэг авах вэ гэдгээс Ардчилсан намын сонгуулийн бодит үр дүн шалтгаална. Өөрөөр хэлбэл, Нийслэлийн Ардчилсан намын дарга чухал хариуцлага хүлээж ирэх сонгуульд орно гэсэн үг.