УИХ-ын чуулганы хуралдаанаар Гэр бүлийн тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслийг хэлэлцүүлж байна. Хуулийн төсөлтэй холбоотой гишүүд асуулт асууж байна. 

УИХ-ын гишүүн С.Одонтуяа: Гэр бүлийн тухай хууль их оройтож орж байна. 1999 оны хуулийг мөрдөж байгаа байх шүү. Олон парламент дамжиж, олон буцсан хуулийн төсөл. 2022 оны гуравдугаар сарын 8-нд эмэгтэй гишүүд гэр бүлийн тухай хуульд өөрчлөлт оруулах хуулийн төсөл өргөн мэдүүлсэн. Засгийн газраас энэ хуулийн төсөл орж ирэхтэй холбогдуулаад Бид хуулиа хамтарч хэрэгжүүлэхээр төлөвлөсөн. Өнгөрсөн гурван жил С.Одонтуяа хоёр эхнэртэй хууль батлуулах гээд байна гэж маш их гүтгэсэн. Миний хувьд ийм зүйл байхгүй гэдгийг хэлье. Гэр бүл болсноосоо эхлээд олон асуудал тулгарч байна. Цөөн хүн амтай улсад жилд 3000-4000 гэр бүл салж байна гэдэг бол өндөр үзүүлэлт. Тиймээс бид Гэр бүлийн хуулиараа гэр бүл салахгүй байх тал дээр урьдчилан сэргийлэх зүйл заалтыг тусгамаар байна. 2017 онд Ардчилсан эмэгтэйчүүдийн холбоо гэр бүлийн асуудлаар хэлэлцүүлэг хийсэн. Энэ үеэр тэтгэмжтэй холбоотой санал маш их гарч байсан. Сая хуулийн танилцуулгад тэтгэмж 50 хувь нь л олгогдож байна гэж уншлаа. Үлдсэн 50 хувийг нь яах гээд байгаа юм бэ. Төлбөрийн чадваргүй нөхөр нь архи дарс уугаад явчихдаг гэр бүлүүд яах юм бэ. Эрсдлийн сан гэж байгуулах санал иргэдээс их ирж байсан. Гэр бүлийн асуудлаар дагнасан сэтгэл зүйчдийг төрөөс дэмжих асуудал байна уу

ХЗДХ-ийн дэд сайд Б.Солонгоо: Шүүхэд гэр бүл цуцлуулахтай холбоотой жилд 2700-2800  нэхэмжлэл ирдэг. Шүүхэд бүртгэлтэй мэдээллээс харахад тэтгэмж олгох асуудал сүүлийн үед нэмэгдсэн байна. Харин гэр бүл салахад хүүхэд хамгийн их хохирдог. Хүүхдийн тэтгэлэгтэй холбоотой 50 хувь нь төлөгдөхгүй байх төлбөрийн чадвартай холбоотой янз бүрийн асуудал байдаг. Үүнийг Шүүхийн шийдвэр гүйцэтгэх тухай хуульд нэмэлт, өөрчлөлт оруулах заалтууд орсон. Цаашид эвлэрүүлэн зуучлах ажлыг мэргэшүүлэх, гэр бүлийн сэтгэл зүйч нийгмийн ажилтны оролцоог нэмэгдүүлэх дэмжлэг үзүүлэхээт тусгасан.