Нийслэлд өчигдөр авто зам дээр ачаалал үүсэж, түгжрэл олон цагаар үргэлжилсэн нь иргэдийн бухимдлыг төрүүлээд байгаа юм. Улмаар түгжрэл ихэссэн нь хотын төв рүү төлбөртэй нэвтрүүлэх хуулийн төслийг дэмжүүлэхтэй холбоотой үүсэж байна хэмээн олон нийт хардаж буй. Энэ талаар Нийслэлийн Засаг даргын зөвлөх Д.Сайнзориг мэдээлэл өглөө. Тэрбээр "Түгжрэлийг зохиомлоор үүсгэлээ гэх яриа гаргасан хүмүүсийн өмнөөс харамсаж, өрөвдөж байна.

Нийслэлчүүдийн нийтлэг асуудал болчихоод байхад ийм үйлдэл гаргана гэж байхгүй  шүү дээ. Тээврийн цагдаагийн албанаас гаргасан мэдээллийг харсан бол өчигдөр нэлээд осол гарсан. Үүнтэй холбоотой асуудал байна. Хүйтэнд цас, хялмаатай байсан учраас машины хөдөлгөөн саарсан. Түгжрэлийн асуудал хүнд байгаа. Үүнийг нуугаад яах вэ. Түгжрэлийг шийдэх байдлыг өнгөц байдлаар шийдэхгүй. Ирэх жил дэд бүтцийг сайжруулах асуудлыг ирэх жилийн төсөв дээр хэлэлцэж байна. Гэрлэн дохиотой уулзварыг багасгана. Эдийн засгийн хөшүүрэг болсон зогсоолын асуудлыг шийдвэрлэе гэж байгаа. Ер нь бол мушгиж гуйвуулаад байгаагаас биш хууль батлагдсны дараа хэрэгжүүлэх гээд байгаа юм биш. Тодорхой нөхцөлүүдээ бүрдүүлсний дараа хэрэгжүүлэх юм. Нэгдүгээрт, нийтийн тээврийн хүртээмжийг нэмэгдүүлж, 5-10 минутын дотор хуваарийн дагуу явдаг байх. Үүнд зориулаад замуудыг эгнээг өргөтөх, автобусны зогсоолыг нэмэх.

Хоёрдугаарт, авто зогсоолуудаа нэмэх нөхцөлүүдээ бүрдүүлчихээд төлбөртэй бүсэд нэвтрэх ажлыг хэрэгжүүлнэ. Түүнээс биш юу юугүй иргэдээс мөнгө авах гээд байгаа юм биш. Авсан мөнгөө зам харилцаа, түгжрэлийн эсрэг арга хэмжээнд зарцуулна. Урт хугацаандаа гэр хорооллын асуудлыг цогцоор явуулах, анхан шатны үйлчилгээ нь гуран метр дотроо байдаг байхаар шийдэх юм. Автобусны өмнөх гэрээтэй холбоотой 134 тэрбум төгрөг шилжсэн юм билээ.  Энэ асуудал АТГ дээр шалгагдаж байгаа. Үүний хүрээнд нийлүүлэх том оврын автобусны тендер цуцлагдсан. Үлдсэн 180 орчим тэрбум төгрөгт тааруулж, олон улсын тендер зарласан. Тендер арваннэгдүгээр сарын 24-нд нээгдэнэ. Техникийн тодорхойлолтод манайхаас тавьж байгаа шаардлагад нийцсэн автобус орох байх гэсэн хүлээлттэй байна. Өнөөдрийн байдлаар техникийн тайлбар дээр 12 компани тодруулга авсан. Энэ нээлттэй тендер дээр оролцогч сонирхогчид байгаа юм байна. Бид 180 тэрбум орчим төгрөгөөр доод тал нь 600 автобус авна гэсэн хүлээлттэй байна. Ингээд одоо хугацаа нь дуусах болоогүй үйлчилгээнд явж байгаа 600 автобусыг нэмээд 1200 автобус үйлчилгээнд явуулна. Нийслэлийн тээвэрт явж байгаа чиглэлийг богино холбоостой болгож тогтоохгүй бол болохгүй байна. Жишээлбэл, Толгойтоос Шархад хүртэл явдаг чиглэлийг тодорхой компаниуд тогтоолгоод явж байгаа. Хоёрдугаарт, автобусны төлбөрийн асуудлыг эргэж харах шаардлагатай байна.

Мөн автобусны буудлуудыг дулаан газар хийе гэхээр нийслэлийн төвийн байршлыг 20-30 жилээр компаниудад эзэмшүүлчихсэн байна. 2014 оноос өгсөн компаниудтай уулзаж эхэлсэн. Баригдаагүй метроны буудлыг барьсных нь дараа 30 жилээр ашиглуулна гээд өгчихсөн байгаа юм" гэлээ.