Засгийн газрын хуралдаанаар хэлэлцсэн асуудлын талаар мэдээлэл хийж байна.

ЗГХЭГ-ын дарга Д.Амарбаясгалан “Засгийн газрын хуралдаанаар 20 гаруй асуудал хэлэлцсэн. Үүнээс онцлоход Худалдаа аж үйлдвэрийн танхимын хуулийн шинэчилсэн найруулгын төслийг өргөн барих асуудлыг хэлэлцэж, шийдвэрлэлээ. Өнгөрсөн долоо хоногт Ерөнхий сайд  МХАҮТ-ийн шинэ захирал болон удирдлагуудтай зөвлөлдөх уулзалт зохион байгуулсан. Засгийн газар, УИХ-ын зүгээс бизнесийн орчинд нь эрх зүйн орчинг бүрдүүлэх талаар санал солилцсон.

Худалдаа аж үйлдвэрийн танхимын хувьд бүтцээ тэлж,  танхимын холбоод нь салбар бүрийг төлөөлдөг байхаар хуулийн төслийг боловсруулаад байна. Иргэдээс хамгийн их ирдэг гомдол бол төрийн бус байгууллагуудын бүтэц, чадвар, чадамж хангалттай бус байна. Ялангуяа төрийн бус байгууллагын дийлэнх нь хэсэг бүлэг хүмүүсийн байгуулсан, эцсийн эзэмшигч нь хувь хүн байна. Байгууллагуудын чиг үүргийн хувьд төрийн үүргийг гүйцэтгэх боломж бүрддэггүй гэж байна. Хамгийн сүүлд МОНАДА-гийн жишээн дээр асуудал гарсан. Өнөөдөр хуулийн шинэчилсэн найруулгын хүрээнд хувийн хэвшлийн үүрэг хариуцлага илүү тодорхой байх, төрөөс авах эрх үүрэг нь тодорхой байх чиглэл дээр анхаарал хандуулах талаар ярилцлаа. Мөн үүнтэй холбоотой дагалдах хууль эрх зүйн орчинг  бүрдүүлэх дээр санал нэгдсэн” гэлээ