УИХ-ын гишүүн, Уул уурхай, хүнд үйлдвэрийн сайд Ж.Ганбаатар хэд хэдэн сэжмээр уул уурхайн бизнестэй, тэр тусмаа нүүрстэй холбогддог.

           Тухайлбал, Ж.Ганбаатарын төрсөн дүү Ж.Нарантуяа нь Хаянхярваагийн Азбаяр гэгчтэй “Оргил үүдэн зам” ХХК-ийг саяхныг болтол хамтран эзэмшсэн. Хаянхярваагийн Азбаяр нь УИХ-ын гишүүн Б.Дэлгэрсайхантай “Монголиан транс ложистик” ХХК-ийг хамтран эзэмшдэг. Х.Азбаяр, Б.Дэлгэрсайхан нарын “Монголиан транс ложистик” ХХК нь өнгөрсөн 2022 онд Засгийн газартай 400 сая ам.долларын концессын гэрээ байгуулж, Зүүнбаян-Ханги чиглэлийн 226 км төмөр замыг барьж, өнгөрөгч арваннэгдүгээр сард ашиглалтад оруулсан байдаг. Б.Дэлгэрсайханы хувьд, Дорноговь аймгийн Хөвсгөл сумын нутагт үйл ажиллагаа явуулдаг Сор говь нүүрсний уурхайгаас эхлээд хэд хэдэн нүүрсний уурхайтай. Уурхайн нүүрсээ хувийн вагонуудаараа урагш нь гаргадгаас гадна, илүү вагонуудаа “УБТЗ” ХНН-т түрээслүүлдэг нэгэн. Чухамдаа Уул уурхай, хүнд үйлдвэрийн сайд Ж.Ганбаатар, УИХ-ын гишүүн Б.Дэлгэрсайхан нар бизнесийн “нууц” хамтрагчид байж болзошгүй сэжүүр үүгээр гарч ирж байгаа юм.

           Түүнчлэн, УИХ-ын гишүүн, Уул уурхай, хүнд үйлдвэрийн сайд Ж.Ганбаатар “Гурвангол бааз” ХХК-ийг 2021 оноос “Камдер” ХХК-аараа дамжуулан эзэмшдэг болсон. Одоо “Гурвангол бааз” ХХК-ийн гүйцэтгэх захирлаар Ж.Ганбаатарын төрсөн дүү Ж.Нарантуяа ажилладаг. Сонирхолтой нь, “Гурвангол бааз” ХХК-ийг Үндсэн хуулийн цэцийн гишүүн Цагааны Нанзаддорж, “Гацуурт”-ын Л.Чинбатын худ буюу Соёлын сайд Ч.Номингийн хадам аав Төмөрбаатарын Ганхуяг нар үүсгэн байгуулж, эзэмшиж байгаад 2021 онд Ж.Ганбаатарт шилжүүлсэн байдаг. Т.Ганхуягийн хувьд худ Л.Чинбаттайгаа анх “Гурван гол” ХХК-ийг үүсгэн байгуулж, Ноён ууланд алт ухаж эхэлсэн.  Дараа нь Л.Чинбат “Гацуурт” ХХК-ийг, Т.Ганхуяг “Гурван гол холдинг” ХХК-ийг үүсгэн байгуулж, тус тусдаа уурхай нээцгээсэн. Өдгөө тэд алтнаас нүүрс рүү урвацгааж буй. Үүсгэн байгуулсан компаниа Ж.Ганбаатарт шилжүүлсэн Т.Ганхуягийн тухай нэг ноцтой баримт дурдахад, түүний “Гурван гол холдинг” ХХК нь “Баян-айраг эксплорэйшн” ХХК-ийг эзэмшдэг. Харин “Баянайраг эксплорэйшн” ХХК нь Завхан аймгийн Дөрвөлжин сумын нутагт “Баян айраг” хэмээн асар том уурхай ажиллуулдаг.

             Товчхондоо, УИХ-ын гишүүн, Уул уурхай, хүнд үйлдвэрийн сайд Ж.Ганбаатар нүүрстэй ч, алттай ч, төмөр замтай ч энэ мэтээр холбогддог ашиг сонирхлын асар зөрчилтэй нэгэн.