УИХ-ын чуулганы нэгдсэн хуралдаанаар Засгийн газраас яаралтай горимоор өргөн барьсан Нийслэл Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах тухай хуулийн төсөл болон хамт өргөн мэдүүлсэн хууль, тогтоолын төслүүдийг хэлэлцэх эсэх асуудлыг хэлэлцсэн юм. Энэ үеэр УИХ-ын гишүүн Т.Доржханд Х.Нямбаатар нар маргав.

УИХ-ЫН ГИШҮҮН Т.ДОРЖХАНД: Хотын дарга хуулийн төсөл оруулж ирж байгаа бол Их хуралд хүндэтгэлтэй хандах ёстой байх. Их хурлын гишүүн байсны хувьд үүнийгээ мэдэж байгаа байлгүй дээ. 

НИЙСЛЭЛИЙН ЗАСАГ ДАРГА БӨГӨӨД УЛААНБААТАР ХОТЫН ЗАХИРАГЧ Х.НЯМБААТАР: Хуулийн төслийн танилцуулга болон хууль санаачлагчийн илтгэлийг таны хамгийн дотнын найз ЗГХЭГ-ын дарга Д.Амарбаясгалан танилцуулсан. Би ажлын хэсгийн гишүүний асуултад хариулт өгөх хүрээ хязгаарын хүрээнд л хариулт өгч байна. Яаж хариулахаа таниар заалгахгүй. 

УИХ-ЫН ГИШҮҮН Т.ДОРЖХАНД: Би хэнтэй нөхөрлөж яаж явахаа таниар заалгахгүй. Би таныг хотын даргын хувьд хариулт өгөхийг хүсэж байгаагаас биш Хууль зүйн сайд шиг, УИХ-ын гишүүнээр олон сонгогдсон хүний шиг хариулж байгаа нь, ялангуяа сөрөг хүчний гишүүдэд хүндэтгэлгүй хандаж байгаа чинь таалагдахгүй байна Нямбаатар аа.