УИХ-ын нэгдсэн чуулган хуралдаж байна. Хуралдаанаар Улаанбаатар хотын  замын хөдөлгөөний түгжрэлийг бууруулах, гэр хорооллыг орон сууцжуулах тухай хуулийн төсөл болон хамт өргөн мэдүүлсэн хуулиудын хэлэлцэх эсэх асуудлыг хэлэлцэж байна. Энэ үеэр гишүүд асуулт асууж, хариулт авч байна. Энэ үеэр УИХ-ын гишүүн Ц.Сандаг-Очир асуултад Нийслэлийн Засаг дарга бөгөөд Улаанбаатар хотын захирагч Х.Нямбаатар хариуллаа.

      Тэрбээр “Бид цаашид гэр хорооллыг орон сууцжуулах, барилгажуулах төсөл хөтөлбөрийн хүрээнд дэд бүтцийн асуудал дээр урьдын барьж ирсэн бодлогодоо зарчмын өөрчлөлт гаргах ёстой. Сонгинохайрхан дүүргийн дэд төвийн барилга угсралтын  ажил хэдийн эхэлсэн байгаа. ирэх жилийн дөрөвдүгээр сард эхний 800 айлын орон сууц ашиглалтад орно. Ирэх жил бид Сэлбэ дэд төвийн 12000 айлын орон сууцны барилга угсралтын ажлыг эхлэх  гэж байгаа. Одоо Сэлбэ дээр ажиллаж байгаа дулааны станц 15 хувийн хүчин чадлаар ажиллаж байгаа. 2025 оны эхээр дахин нэг дэд станц ашиглалтад орно. Ингэснээр долоон буудал, зургаан буудал, хайлааст, чингэлтэй, Дамбадаржаа орчмын айл өрхийг орон сууцжуулахад дулаан хүрэлцээтэй гэсэн дүгнэлт өгсөн. Ус хангамжийг ч мөн адил шийдсэн. Эрчим хүчний хүрэлцээг нэмэгдүүлэх чиглэлээр ажиллаж байгаа. Улаанбаатар хотын ерөнхий төлөвлөгөөг зөрчиж барьж байгаа барилга, төслүүд дээр хариуцлага тооцно” гэв.