УИХ-ын чуулганы нэгдсэн хуралдаанаар 2024 оны төсвийн төслийн хоёрдугаар хэлэлцүүлэгийг хийж байна. Хэлэлцэж буй асуудалтай холбоотой УИХ-ын гишүүд асуулт асууж хариулт авч байна.

Энэ үеэр УИХ-ын гишүүн Б.Баярсайхан "2024 оны төсөвт Завхан аймгийн Тосонцэнгэл сум руу нислэг үйлдэх талаар төсөвт тусгасан байгаа юу. Зам тээврийн сайдаар Л.Халтарыг ажиллаж байх үед улсын төсвийн хөрөнгө оруулалтаар Тосонцэнгэл суманд онгоцны буудал барьсан. Гэтэл хэзээ ашиглалтад орох ньтодорхойгүй байна. Завхан аймаг руу долоо хоногт хоёр удаа нислэг үйлддэг. Гэтэл энэ нь хүрэлцээтэй биш уул уурхайн салбарын ажилчид захилга өгөөд билет хүрэлцдэггүй. УИХ-ын гишүүн гишүүний хувьд Завхан руу нислэгээр явахад надад билет олдохгүй байна. Мөн Доной нисэх онгоцны буудлыг олон улсын нисэх онгоцны буудал болгоно гэсэн энэ ажил хэзээ эхлэх вэ" гэв.

Зам тээвэр, хөгжлийн сайд С.Бямбацогт "Улиастай руу алдаг оног нисдэг байсан нислэгийг нэмсэн. Зөвхөн Улиастай гэлтгүй есөн аймаг руу нислэг үйлддэг болсон. Тасалбарын үнэ ч гэсэн буурсан. Алдагдалгүй нисэх ёстой. Тосонцэнгэл рүү шууд нислэг үйлдэх боломжгүй" гэлээ.