Байгаль орчин, аялал жуулчлалын сайд Б.Бат-Эрдэнэ ер нь Ардын намын ах нараасаа хоцорсон түүх үгүй. 2018 онд ЖДҮ-ийн дуулиан дэгдэж, зээлдэгчдийн жагсаалт задрахад Б.Бат-Эрдэнэ Ардын намынхаа ах нартай мөр зэрэгцээд жагсаж л байлаа. Албан тушаалын хуваарилалтаас ч тэр хоцорч байгаагүй. 12 жилийн өмнө Ардын намын босгыг алхсан мөртөө МХЕГ-ын дэд дарга, ЗГХЭГ-ын дэд дарга, ШӨХТГ-ын дарга гээд томилгоо болгоныг алдалгүй ашигласан. Тэгвэл нүүрсний бизнестэй холбоотой улстөрчдийн жагсаалтад ч тэр багтаж байна.

           Тодруулбал, Б.Бат-Эрдэнийн эхнэрийг Дашбаатарын Болортуяа гэдэг. Түүний аав Б.Дашбаатар нь барилгын зураг төсөл, кадастрын “Орд геод” ХХК, уул уурхайн геологи хайгуулын “Орд гео” ХХК-иудыг үүсгэн байгуулсан нэгэн. Уул уурхайн компаниудтай гэрээ байгуулж, геологийн нөөц тогтоох өрөмдлөг хайгуулын ажил гүйцэтгэдэг “Орд геод” ХХК нь салбартаа алдартай. Өдгөө “Орд геод” ХХК-ийг Б.Бат-Эрдэнийн эхнэр Д.Болортуяагийн дүү Дашбаатарын Мөнхдөл эзэмшдэг. Сонирхуулахад, БОАЖ-ын сайд Б.Бат-Эрдэнэ дээр дурдсанчлан 2018 онд ЗГХЭГ-ын дэд даргаар ажиллаж байхдаа ЖДҮХС-аас хадмуудынхаа “Рич холдинг” ХХК-д 400 сая төгрөгийн зээл авч өгч, энэ хэргээсээ болж албан тушаалаа өгсөн. Одоо “Рич холдинг” ХХК-ийг эзэмшигч, гүйцэтгэх захирлаар Батчулууны Чулуу бүртгэлтэй байдаг. Харин Б.Чулуун нь сайд Б.Бат-Эрдэнийн эхнэр Д.Болортуяагийн төрсөн дүү Д.Мөнхдөлийг эхнэр юм.

             Тэгвэл Дашбаатарын Мөнхдөл нь 2020 онд Чулуунтөмөрийн Отгонбаяртай “Кирвэй” ХХК-ийг үүсгэн байгуулж, эзэмшиж байгаад БНХАУ-ын хөрөнгө оруулалттай “Хунт чулуу” ХХК-д шилжүүлжээ. Тэгвэл “Кирвэй” ХХК нь Д.Мөнхдөлийн эзэмшилд байх үеэсээ “Эрдэнэс Тавантолгой” ХК-тай гэрээ байгуулж, Тавантолгойн уурхайгаас БНХАУ-ын Ганцмод боомт хүртэл нүүрс тээвэрлэдэг болсон ажээ. Өөрөөр бол, БОАЖ-ын сайд Б.Бат-Эрдэнэ Ардын намынхаа ах нараас хоцорсонгүй буюу хадам дүүгээрээ дамжуулан нүүрсний бизнестэй холбоотой яваа байж болзошгүй байна.