УИХ дахь АН-ын бүлэг мэдээлэл өгч байна. Энэ үеэр УИХ-ын гишүүн Ж.Батсуурь мэдээлэл өглөө.

                Тэрбээр “2020 оны арваннэгдүгээр сард цар тахал үүсэж, үүнээс хамгаалах шаардлагатай гэж онцгой дэглэж тогтоож байсан. Өнгөрсөн гурван жилийн хугацаанд олон зүйл хийж бас мартсан байна. Цар тахлын нэрийн дор тэр үеийн У.Хүрэлсүхийн Засгийн газар эрүүл мэндээ хамгаалах, эдийн засгаа сэргээх гэж 5.1 их наяд төгрөг зарцуулсан. Дараа нь Л.Оюун-Эрдэнийн Засгийн газар 10 их наяд төгрөгийн хөтөлбөр хэрэгжүүлсэн.  Мөн гадаадын зээл тусламжаар гурван их наяд төгрөг, “Эрдэнэт үйлдвэр” ТӨҮГ-аас 1.2 их наяд төгрөг, “Оюу толгой” ХХК нэг их наяд төгрөгийг гаргуулсан байдаг.  Тэгэхээр өнөөдөр мөнгөний тоо утгаа алдаад байна. Нийтдээ 20 их наяд төгрөгийг “урсгасан”.  Үр дүнгүй зүйлс байгааг ард түмэн харж байгаа.  Үүнийг тодруулахаар өнгөрсөн зургадугаар сард 14 дүгээр  тогтоол гаргаж, цар тахлын үеийн санхүүжилтийг ил болгох ажлыг хэсгийг гаргасан юм. Бид төрийн байгууллагаас тусламж авах, мэргэжлийн шинжээчтэй болох хүсэлт өгсөн ч томилж өгөхгүй байна. Үнэхээр нарийн мэдээллийг өгөхгүй байна. 20 их наяд төгрөгийн нууц задарч, ард түмэн мэдэхээс эрх баригчид айж байна. Бидний 11 гишүүний хүч хүрэхгүй байна” гэлээ.