Монгол Улсын Ерөнхийлөгч У.Хүрэлсүхийн Франц Улсад хийсэн айлчлалын үеэр тус улсын Нант хотод Монголын эзэнт гүрний үеийн үзэсгэлэн дэлгэгдлээ.

Энэ талаар Чингис хаан музейн захирал С.Чулуун “Хоёр улсын Ерөнхийлөгчийн ивээл дор Монгол Улсын Чингис хаан үндэсний музей Франц Улсын Нант хотын Үндэсний түүхийн музейтэй хамтран "Чингис хаан монголчууд дэлхийг өөрчилсөн нь" үзэсгэлэнг нээлээ. Энэ үзэсгэлэнг олон улсад гаргах гэж чамгүй саад бэрхшээлийг туулсан. Үндсэндээ олон улсад гаргах гэж гурван жил хөөцөлдсөний эцэст Франц Улсад гарч байна. Энэ үзэсгэлэнгээр Монгол Улс Чингис хааны дэлхийн түүхэнд гүйцэтгэсэн үүргийг цогцоор нь ойлгуулах зорилготой. Хоёрдугаарт, Чингис хаан музей байгуулагдаад анх удаагаа Европын  соёлын том харилцаатай Франц Улсад үндэсний үзэсгэлэнгээ гаргаж байгаагаараа онцлог юм. Гуравдугаарт, үзэсгэлэнд 20 орчим музей хамтарч ажиллаж байна. Үүнд урьд нь бидний төдийлөн сайн мэддэггүй байсан олон үзмэрүүдээ дэлгэсэн. Нийт 800 гаруй үзмэр гарч байна.

Үүнээс онцолбол, Францын Луврын болон бусад музейд хадгалагдаж байгаа Ил Хаант Улсын гол дурсгалууд, Алтан ордны, Юань гүрний үеийн буюу Монголын Эзэнт гүрний үед монголчуудын түүх соёл, улс төр эдийн засгийн нөхцөл байдал Евро Азийн улс орнуудад ямар нөлөө үзүүлсэн юм бэ гэдгийг гаргаж байгаа юм. Анх удаа нэгдсэн цогц үзэсгэлэн гарч, эрдэм шинжилгээний хурал болж буйгаараа ихээхэн онцлогтой. Урлаг соёлын бүрэн хэмжээний тоглолт буюу Морин хуурын чуулга тоглолтоо сонирхууллаа. Мөн соёлын бүтээлч үйлдвэрлэлийн нэгдсэн үзэсгэлэн гарч байгаа юм. Түүнчлэн үзэсгэлэнд гарч буй бүх үзмэрүүдээ франц хэл дээр орчуулан гаргаж байна. Мөн тус улсын тэргүүлэх сэтгүүл дээр Монголын талаарх мэдээллүүд гарна. Ингэснээр Европын холбооны орнуудад Чингис хааны талаарх түүхийн зөв ойлголтууд бий болно. Энэ үзэсгэлэн дан ганц Франц Улсаар тогтохгүй Чили, Канад АНУ, БНСУ-д 2027 оныг хүртэл цувралаар гарна. Дэлхийд соёлоо сурталчилах том арга хэмжээ болох юм” гэлээ.

     Бүгд Найрамдах Франц Улсын Нант хот нь Нант Матрополь-Луар-Атлантик муж Пэйс дё ла Луар муж гэх түүхэн нэршлүүдтэй. Газарзүйн байршлын хувьд Пэйс дэ ла Луар мужийн нийслэл ба Луар-Атлантикийн засаг захиргааны төв нь Атлантын далайн эргээс зүүн тийш 46 км (29 миль) зайд Луар голын эрэг дээр байрладаг. газар нутгийн хэмжээ нь 7323км2 ба 320000 орчим хүн амтай аж. 

    Үзэсгэлэн гарч буй Францын Нант хотын Үндэсний түүхийн музей нь 15 зуунд баригдаж байжээ. Бретагни 1532 онд Францад нэгдэж орсноос хойш Бретагнийн гүнгийн цайз нь 16-17 дугаар зуунд Францын хаад Бретагни дахь цайз, дараа нь цэргийн хуаран, зэвсгийн үйлдвэр, шорон зэргээр ашиглагдаж байжээ.

     1862 онд Францын түүхэн дурсгалт газраар бүртгэгдэж 1915 онд төрөөс Нант хотод зарагдаж, 1924 онд хотын музей болжээ. 1990 болон 2000 онд цайзад сэргээн засвар хийж 2007 оноос Нант хотын Түүхийн музей нээгдсэн байна. 

     Тус музейд уран зураг, уран баримал, макет-газрын зураг, усан онгоцны загвар, газрын зураг, зурагт хуудас, сийлбэр, гэрэл зураг, шинжлэх ухааны хэрэгсэл, тавилга зэрэг олон янзын цуглуулга хадгалагдаж байна. Музей 32000 гаруй үзмэртэйгээс 1150 гаруй нь 32 танхимд ил тавигдсан байдаг аж.