Бэрх тосгоны үеэл ах дүүс нэг нь улсын, нөгөө нь хотын дарга болов. Тэд яван чангарч байна. Энэ эрчээрээ дараагийн сонгууль гэхэд Хэнтийн үеэлүүд төрд “том” болж мэдэхээр байна.

Ерөнхий сайд Л.Оюун-Эрдэнэ УИХ-ын гишүүн, Хууль зүй, дотоод хэргийн Х.Нямбаатарын “давхар дээл”-ийг тайлуулж, Нийслэлийн Засаг дарга бөгөөд Улаанбаатар хотын захирагчаар томилчихлоо. Ингэхдээ эр зоригтой байхыг сануулаад тамга тэмдгийг нь гардуулав. Нийслэлийн Засаг даргын албан тушаал нэлээд “үнэд” хүрч байгаа нь эндээс харагдаж байна. Өөрөөр хэлбэл, МАН-ын “дайн” нийслэл рүү чиглэж эхэллээ. Уг нь нийслэлийн Засаг даргын ажил өдийд жинхэнэ яс янгинасан хүсээд байх ажил биш байлаа. Ялангуяа “давхар дээл”-тэй сайдын хувьд. Утааны улирал эхэлж, түгжрэл нэмэгдэнэ. Дээр нь өнгөрсөн жилээс хойш нийтийн нийтийн тээврийн парк шинэчлэл хийхээр ярьсан ч бүтэлгүйтсэн учир энэ жил дахиад л хөлдүү, хүрэлцээгүй автобуснууд дахиад л хотын даргын чихнээс “хонх” уяна.

Харин Х.Нямбаатар “Хууль зүйн сайдын ажилдаа дахиж оролцохгүйгээр нийслэлийн Засаг даргын ажилд сэтгэлээ зориулан ажиллана” хэмээн өчигдөр ИТХ дээр ам тангаргаа өгч харагдана лээ. Тэр ч бүү хэл “Ирэх сонгуульд нэр дэвшихгүй нийслэлийн ажилд төвлөрч ажиллана” хэмээн мэдэгдсэн. Х.Нямбаатар Ерөнхий сайдаас том даалгавар аваад нийслэлд томилогдлоо.сӨөр дээрээ гал дуудан байж “фронт” руу орж байна. Ирэх сонгуулиар нийслэлийг Д.Сумъяабазар, Д.Амарбаясгалан нарын хэн нь удирдахгүй юм байна. Х.Нямбаатар удирдаж орохоор бэлтгэл ажилдаа орж буйн эхлэл энэ юм.

 Л.Оюун-Эрдэнэ Х.Нямбаатар нар өнгөрсөн хугацаанд У.Хүрэлсүхийн гэх малгайн дор явж ирсэн. Тэгвэл ирэх сонгуулиар тэд өрх тусгаарлаж, шинэ аг бүрдүүлэхээр улайрч эхэлж байгаа нь энэ. Ирэх сонгуулиар нийслэлийн МАН-ыг атгачихвал тэд эрх мэдэлд хэний ч дэмжлэггүй болох том мөрөөдөл тээж байгаа нь тодорхой байна.Гаргаж багаа улс төрийн шийдвэрүүд дээрээс нь ч тодорхой болж буй. Өөрөөр хэлбэл, 2024 оны сонгуульд Х.Нямбаатар нийслэлийн МАН-ыг удирдан орж, орон нутгийн  сонгуулийг ч гардах үүрэг чиглэл авсан.

Мэдээж энэ хугацаанд хотод халаа сэлгээний ажлыг тухтай гэгч нь хийгээд жинхэнэ өөрийн гэсэн хүмүүсээрээ хүрээлэл үүсгэнэ. Нийслэл дээр 5Ш ажиллагааг эхлүүлж, хотыг их цэвэрлэгээнд бэлдэнэ. Сонгууль гэхэд Х.Нямбаатар нийслэл дээр овоо том багтай болж, Ерөнхий сайдад дэм болох төлөвлөгөөтэй тэд ийн зүтгэж эхэлсн бололтой. Мэдээж Ерөнхий сайд улс төрд зүтгэсэн цагаасаа хойш дөрөө нийлсэн ганц үеэл ахыгаа хотын даргаар насаар нь ажиллуулахгүй нь тодорхой. Тиймээс сонгуулийн дуулиан шуугиан намжтал хотын ажлыг нь хийлгээд ирэх сонгуулийн дараагаас шинэ Засгийн газарт авч ирэх төлөвлөгөө гаргачихсан суугаа гэх.

Шинэ Засгийн газарт сайдаар ирэхдээ шат ахисан албан тушаалд хүрч, Засгийн газрын хэрэг эрхлэх газрын даргаар томилох тохироотой өнөөдөр “давхар дээл”-ийг нь тайлуулж байгаа юм байна. Энэ хугацаанд Х.Нямбаатар нийслэлийн иргэдээс оноо авах нэг л том ажлыг эхлүүлэхээр тооцоо гаргачихсан суугаа гэдэг.  Мэдээж нэн тэргүүнд хот хариуцсан газрын дарга нарыг халж, ойрын хүмүүсээ албан тушаалд томилох нь тодорхой.  Энэ талаараа ч тэрбээр “Мэдээж хамгийн түрүүнд нийслэлд хийх ажил нь бүтцийн асуудлыг цэгцэлэх Төрийн данхар бүтцийг багасгаж, урсгал зардлыг хэмнэх ёстой. Төр, хувийн хэвшлийн түншлэлийг сонгодог утгаар нь нийслэлд хөгжүүлнэ. Урсгал зардлаас хэмнэсэн хөрөнгийг газар чөлөөлөх ажилд зарцуулна. Хуулийн том баг энд хэрэгтэй. Нийслэлийн эрх зүйн байдлын тухай болон  түүнийг дагасан шийдвэрүүдийг боловсруулах хээгтэй. Хатуухан шийдвэрүүд гаргана. Энд сайн хуулийн баг хэрэгтэй. Тиймээс Хууль зүй дотоод хэргийн яаманд ажиллаж байгаа нөхдөө хамт гаргах асуудлыг ярина” хэмээн мэдэгдсэн.

Хууль зүй дотоод хэргийн сайд асан Х.Нямбаатар  Ерөнхий сайдын нэр хүндийг өсгөхийн тулд “Авлига” хорооллыг буулгах ажлыг гардан хийхээр газрын дарга нарыг нь тойглож эхэлсэн гэнэ. Нэг ёсондоо Х.Нямбаатар, Л.Оюун-Эрдэнэ нар 1.7 сая хүн амтай нийслэлд “сэлэм” эргүүлж, ирэх сонгуулийн оноогоо эндээс авахаар тооцоолсон нь энэ.

Өнгөрсөн хугацаанд Ерөнхий сайд 21 аймгийн 16 аймагт өөрөө албан ёсоор очиж, хөдөө орон нутгийн иргэдтэй нүүр тулж уулзаад ирсэн. Энэ үеэрээ сонгуулийн рейтэнгээ судлаж, байр байдлыг ажигласан. Гэтэл очсон аймаг болгонд иргэд түүийг таатай хүлээж авсангүй. Засгийн газрын ажил нь ч, өөрөө ч олигтой дүн авч чадсангүй буцаж ирсэн. Иймд хөдөө орон нутагт найдлага тасарсан Ерөнхий сайд Л.Оюун-Эрдэнэ Х.Нямбаатарыг хотын “БЭТ”-ээр томилж, ирэх сонгуульд нийслэлээс олонхын суудал авах ажилдаа шуурхайлав.