Нийслэлийн онцгой байдлын газраас Улаанбаатар хотод тархсан хурц үнэр болон угаарын асуудлаар мэдээлэл хийж байна. Нийслэлийн Онцгой байдлын газрын Гамшгаас урьдчилан сэргийлэх хэлтсийн дарга, хурандаа Г.Нэргүй "Улаанбаатар хотод хийн газ үнэртэж байна гэсэн мэдээлэл гарч эхэлсэн. Шадар сайдаас энэ асуудлаар үнэн зөв мэдээлэл өг гэсний дагуу бид мэдээлэл хийж байна. 2023 оны аравдугаар сарын 11-ны 22:00 цагаас Баянзүрх, Хан-Уул дүүргийн зарим нутагт хийн газтай ойролцоо зүйл үнэртсэн гэх 230 орчим дуудлага ирсэн. Налайх дүүрэгт төмрийн үйлдвэрт гал гарсан гэсэн дуулага ирээгүй.

Тавантолгой түлшийн Зүүн үйлдвэр үйл ажиллагаа хэвийн явж байгаа. Туршилт хийсэн зүйл байхгүй. Иймд юунаас болж газ мэт үнэр гарч байгаа талаар мэргэжлийн байгууллагууд ажиллаж байна. Одоогоор хараахан дүгнэлт гараагүй. Энэ үнэр хийн газ биш. Агаарт дэгдсэн газ ингэж удаан үнэртэх боломжгүй. БЗД-т үйл ажиллагаа явуулж байгаа газ түгээх газруудад эрсдэл үүсээгүй. Харин БЗД-ийн Дүнжингарав худалдааны төв орчимд 800 метрийн бохирын шугамнаас үнэр гарч, багажаар үнэрийг хэмжихэд ажилласан тос масло шугамд нийлүүлснээс болсон байж болзошгүй гэж үргэлжүүлэн шалгалт хийж байна. Шалгалтын хүрээнд Налайхаас Дүнжингарав хүртэл 500 м-ийн бохирын шугамыг шалгаж байгаа. Эцсийн дүгнэлт гараагүй. Харин Хан-Уул дүүргийн 20 дугаар хороо Эрүүл мэндийн төвийн ойролцоо "Бензин, масло шиг зүйл урсаж байна" гэсэн дуудлагын дагуу ажилласан. Моторын тосны угаадсаа асгасан "Делта сервис"-ийн үйл ажиллагааг бүрэн зогсоохоор ажиллаж байна. 2023 оны аравдугаар сарын 12-нд Нийслэлийн эрүүл мэндийн төвд угаар болон газтай холбоотой дуудлага бүртгэгдээгүй. БЗД-ийн 11 дүгээр хороолол Хонхорын Содмонгол шатахуун түгээх станц орчимд хий алдагдсан байж болзошгүй гэх мэдээллийн дагуу шалгалтын ажиллагаа явуулж байна" гэлээ.