Дөнгөж төрсөн эмэгтэйг өвлийн хүйтэнд углааш, халаатай төрөх эмнэлэг рүү тээвэрлэсэн хэмээн 2019 онд нийгэм даяараа шуугиж, У.Хүрэлсүхийн Засгийн газар хариуцлагаа  хүлээгээд бүрэн бүрэлдэхүүнээрээ огцорч байлаа.

       Тухайн үед Ерөнхий сайдаар ажиллаж байсан одоогийн Ерөнхийлөгч У.Хүрэлсүх “Эрүүл мэндийн сайдаа дангаар нь огцруулж чадахгүй, бүрэн бүрэлдэхүүнээрээ бууна. Би ажлаа өгнө. Бид хариуцлагаа хүлээнэ. Төрийн албан хаагчид үүнээс ухаарал аваг. Доод, дунд шатандаа алдаа гаргавал Ерөнхий сайд нь хүртэл огцордог юм байна гэдгийг ойлгог” хэмээн мэдэгдэж байсан удаатай. Нэг үгээр хэлбэл, энэ үйл явдлын үеэр МАН-ын бүх шатныхан хүүхэд, эмэгтэйчүүдийн эрх зөрчигдсөн тохиолдолд хариуцлага хүлээдэг шинэ соёлыг эхлүүлж байгаагаа албан ёсоор мэдэгдсэн. Ард түмэн ч тэгж ойлгосон. Гэтэл Ерөнхийлөгчийн эхлүүлсэн улс төрийн соёл өнөөдөр бодит байдал дээрээ огт хэрэгжсэнгүй.

       Насанд хүрээгүй хүүхдүүдийн эрх зөрчигдсөн гэх цочирдом мэдээллүүд ар араасаа удаа дараа гарах болсон. Хүүхдийн эрх зөрчигдөж, амь эрсдсэн цөөн хэдэн жишээг эргэн сануулахад 2021 онд Өвөрхангай аймгийн Зүүнбаян-Улаан сумын дотуур байрны сурагчийг нутгийн малчин хээр аваачиж, хүчирхийлж, хөнөөсөн. Улмаар өөрийгөө буудсан харамсалтай хэрэг гарч байлаа.

       Энэ оны гуравдугаар сард Баян-Өлгий аймгийн Өлгий сумаас 19 настай Д.М гэх охин "Хоёр найзтайгаа уулзана" гэж гэрээсээ гараад сураггүй алга болсон Улмаар охиныг хөнөөж, цогцсыг нь шуудайнд хийгээд нуусан хэрэг гарсан. Саяхан нийслэлд гурван хүүхэдтэй эмэгтэй гэртээ дөрвүүлээ угаартаж нас барсан. Улмаар хичээлдээ явж байсан 13 настай хоёр охин гарцаар гарч яваад машинд дайруулж нэг нь газар дээрээ амиа алдаж, нэг нь хүнд бэртсэн харамсалтай хэрэг нийгмийн цочроосон.

     Удалгүй Дорнод аймагт алга болсон долоон настай хүүг хойт аав хөнөөж, цогцсыг нь хээр хаясан байж болзошгүй аймшигт хэрэг гарсан. Мөн нэг айлын хоёр хүүхэд гэрийнхээ цонхоор унаж нас барсан харамсалтай хэрэг олныг цочроосон. Тэгвэл саяхан Дорноговь аймгийн Сайн шанд сумаас алга болсон 12 настай охиныг шоронгоос суллагдаад удаагүй этгээд хичээлдээ явах замд нь хулгайлж, амийг нь хөнөөсөн харамсалтай хэрэг бүртгэгдээд буй. Мөн Улаанбаатар хотын Баянхошуунд саяхан таксийнд суусан 14 настай охиныг 25-27 насны таксины жолооч хүчиндсэн гэх хэргийг цагдаагийн байгууллагаас шалгаж эхлээд байна.

       Ийн амьдралд хөл тавиад удаагүй алдрайхан үрс хорвоогийн хатуу зовлонтой нүүр тулж, хэдэн мянган эх хүн үр хүүхдээсээ хагацаж, дээлтэй хатаж байна. Зөвхөн гэмт хэргийн золиос болж, амиа алдсан цөөн хэдэн сүүлийн үеийн жишээг бид дурдсан. Үүнээс гадна хаалттай хаалганы ард хичнээн мянган бяцхан зүрхийн эрх зөрчигдөж, хэдэн ээж зүрхээ шимширтэл шаналж суугаа бол.

    Энэ мэтээр өдөр бүр хүүхдийн эрх зөрчигдсөөр байхад хүүхдүүдийн өмнө хариуцлага хүлээх улс төрийн соёл байх нь битгий хэл уулчлал гух хүнлэг сэтгэлтэй нэгэн ч ховор болжээ. Хамгийн сүүлд өрнөсөн жишээнээс үзэхэд Дорноговь аймагт алга болсон охиныг хамгаалах, амь эрсдэхээс өмнө олох боломж байсан гэдэг нь хэдэн хэдэн баримтаар нотлогдож буй. Өөрөөр хэлбэл, томчуудын хайхрамжгүй үйлдлээс болж охиныг эрэн хайх ажил удааширч, цаг алдсан. Тухайн үед аймгийн төвийн хяналтын камерууд бүрэн ажллагаатай байсан бол гэмт этгээдийг тав алхуулалгүй барьж авах боломж их байлаа. Гэвч хэдэн жилийн өмнө камержуулсан ажилд хяналт тавиагүй хайхрамжгүй хандсан тус аймгийн удирдлагууд өнөөдрийг хүртэл улс төрийн хариуцлагаа хүлээгээгүй байна.

    Уг нь бол өдийд Ерөнхийлөгчийн  эхлүүлсэн улс төрийн соёл хэрэгжиж байсан бол мянга мянган бяцхан зүрх аймшигт хэргийн золиос болсон энэ олон хэргийн ард улс төрийн мөн ч олон албан тушаалтнууд хариуцлагаа хүлээж, уулчлалт гуйгаад хүүхдийн эрхийн төлөө ажиллаж чадаагүй гэдгээ хүлээн зөвшөөрөх байлаа. Аймаг, сум, дүүрэг, нийслэлийн Засаг дарга нараас эхлээд Засгийн газар огцрох хэмжээнд хүртлээ олон хүүхэд гэмт хэргийн золиос болов. Гэвч улс төрийн улайрал хэрээс хэтэрч хүүхдийн эрх зөрчигдөж буй асуудал дээр нийгмээрээ цахим орчинд хэсэг шуугиж байгаад л мартчихдаг эмэгнэлтэй дүр зураг өнөөдрийг хүртэл байсаар байна. Бодит байдал дээрээ хүүхдийн эрхийн зөрчилтэй холбоотой энэ асуудлаар улстөржих хандлага ажиглагдах  болсон нь нууц биш юм.

      Углааш, халаадтай эхийг хоёрхон хоногтой нярайтай нь хамт хөхөө өвлийн хүйтэнд эмнэлгээс гаргасан асуудалд хариуцлага хүлээж хоёр жил хагасын өмнө У.Хүрэлсүх Засгийн газраа огцруулж байв. Өөрөөр хэлбэл, өмнөх Засгийн газар нь углааштай эхийн өмнө хариуцлага хүлээж танхимаараа огцорсон, тэгвэл аймшигт хэргийн золиос болж, утаанд угаартаж амиа алдаж буй хүүхдүүдийн өмнө Засгийн газар ямар хариуцлага хүлээх юм бэ. Л.Оюун-Эрдэнэ Засгийн газраараа биш юм гэхэд төлөөлж хэн нэгэн нь хариуцлага хүлээхгүй юм бол У.Хүрэлсүхийн Засгийн газрын огцролт улс төрийн “шоу” байсан болж хувирах нь. хүүхэд, эмэгтэйчүүдийн төлөө хариуцлага хүлээдэг байх улс төрийн соёл чинь яасан бэ, МАН-ынхан.