Засгийн газрын хуралдаанаас гаргасан шийдвэрийг танилцууллаа. Энэ үеэр Хууль зүй, дотоод хэргийн сайд Б.Энхбаяр “Бид ялын бодлогыг чангаруулж байгаа асуудлыг сэтгэл хөөрлөөр юм уу нэг удаагийн тохиолдлоор авч үзээгүй. Сүүлийн таван жилийн байдлаар хүчиндэх гэмт хэргийн хохирогчдын 62.7 хувь нь 18 нас хүрээгүй хүүхэд байна, хүчиндэх гэмт хэргийн хохирогчдын гурван хүн тутмын хоёр нь хүүхэд байна гэдэг мэдээлэл гарсан. Энэ төрлийн гэмт хэрэгт ямар ял ноогдуулж байна вэ гэдгийг авч үзвэл,

• Сүүлийн хоёр жил нийтдээ 432 хүнийг энэ төрлийн гэмт хэрэгт буруутайд тооцож шүүхээс ял ноогдуулсан байна. Эдгээрийн 22.7 хувь нь урьд нь ял шийтгүүлж байсан бөгөөд 2021 оны байдлаар 54.6 хувьд нь 10-15 жилийн хорих ял, 2022 онд 52.4 хувьд нь 10-15 жилийн хорих ял ноогдуулжээ.

       Энэ хоёр судалгаа бага насны хүүхдийн эсрэг үйлдэгдэж байгаа гэмт хэрэг, тэр тусмаа бага насны хүүхдийг хүчиндэх гэмт хэрэгт ноогдуулах Эрүүгийн хуулийн ялын бодлогыг чангаруулах шаардлагатай гэдгийн нотолгоо юм. Магадлангийн асуудал ямар байгааг сүүлийн арван жилээр судалж авч үзлээ. 2013-2023 оны хугацаанд бусдыг санаатай хөнөөх, бага насны хүүхдийг хүчиндэх, авлига албан тушаалын хэрэгт нийтдээ 3879 хүн суллагдсан байна. Энд суллагдсан хүмүүсийн 52.9 хувь нь хүн хөнөөх, 47.9 хувь хүчиндэх, 13.7 хувь нь бага насны хүүхдийг хүчиндэх гэмт хэрэг үйлдсэн, 1.6 хувь нь авлига, албан тушаалын гэмт хэрэгт ял шийтгэгдсэн хүмүүс байна. Ялын бодлогыг чангаруулах хүрээнд шийдэгдсэн хоёр дахь зарчмын шинжтэй асуудал бол бага насны хүүхдийн Эрүүгийн хуульд байгаа насны хязгаарыг 16 нас болгон нэмэгдүүлэхээр шийдвэрлэгдлээ. Ингэснээр 14-16 насны хүүхдэд эсрэг үйлдэгдэж байгаа ялын бодлого одоо Эрүүгийн хуульд байгаа 14-ээс доош насны хүүхдүүдтэй адил байна. Хүчиндэх гэмт хэргийн шинжийг хоёр хуваан авч үзлээ. 2015 оны буюу одоо хүчин төгөлдөр үйлчилж байгаа хуулиар хүчиндэх гэмт хэргийн шинжийг хурьцал үйлдсэн үйлдлийг хүнд гэмт хэргийн ангилалд оруулж, ялын бодлогыг 1-5 жилийн ялын бодлогыг 2-8 жил болгон чангаруулж байна. Үүнтэй холбоотойгоор 0-14, 14-16, 16-18 гэсэн насны ангиллаар ял шийтгэлийн бодлогыг зааглалаа" гэв.