Эргэлт.мн мэдээллийн сайтын тусгай сурвалжлагч Б.Энхмарт Франц Улсаас мэдээлж байна.

  Монгол Улсын Ерөнхийлөгч У.Хүрэлсүхийн Бүгд Найрамдах Франц Улсад төрийн айлчлал хийж буй. Энэхүү айлчлал нь Монгол Улсын төрийн тэргүүний түвшинд Бүгд Найрамдах Франц Улсад хийж буй анхны төрийн айлчлал гэдгээрээ онцлогтой юм. Мөн энэ удаагийн айлчлал БНФУ-ын Ерөнхийлөгч Э.Макрон Монгол Улсад төрийн айлчлал хийснээс хойш таван сарын дараа болж буй төрийн хариу айлчлал болж байна. Айлчлал дараах хөтөлбөрийн дагуу болох юм.

• Монгол Улсын Ерөнхийлөгч У.Хүрэлсүх Ерөнхийлөгч Эммануэл Макронтой албан ёсны хэлэлцээ хийнэ.  

• Талууд харилцааг шинэ шатанд гаргах, харилцан сонирхсон салбарт хамтын ажиллагааг өргөжүүлэн бэхжүүлэх, ялангуяа эдийн засаг, хөрөнгө оруулалтын агуулгаар баяжуулах зэрэг өргөн хүрээг хамарсан асуудлаар санал солилцоно.
• Айлчлалын үеэр худалдаа, эдийн засаг, уул уурхай, зам тээвэр, эрчим хүч, геологи, холбооны хиймэл дагуул, онцгой байдал, соёл зэрэг салбарт хамтран ажиллах тухай баримт бичигт гарын үсэг зурна.
• Төрийн тэргүүн нар уур амьсгалын өөрчлөлт, цөлжилт, хүнсний хомсдлын эсрэг хоёр улсын санаачилга, зорилтуудыг уялдуулан хамтран ажиллана.  
• Хот төлөвлөлт, автозамын түгжрэл, агаарын бохирдол, ногоон байгууламж зэрэг чиглэлээр Улаанбаатар, Парис хотын хамтын ажиллагааг дэмжинэ. 
• Айлчлалын үеэр Францын Нант хотын Үндэсний түүхийн музейд  “Чингис хаан-Монголчууд дэлхийг өөрчилсөн нь” үзэсгэлэн нээлтээ хийнэ.
• Морин хуурын чуулга Парис хотын Версалийн ордны Хааны театрт тоглолтоо сонирхуулна.
• Айлчлалын үеэр Монгол-Францын бизнес форум болно. 
• Монгол, Францын хооронд 1965 онд дипломат харилцаа тогтоосон бөгөөд Онцгой эрхт түншлэлийн харилцаатай.​