Дорноговь аймагт алга болсон 12 настай охины цогцсыг өчигдөр олсноор албан ёсоор эрлийн ажиллагааг зогсоосон. Энэ талаар тус аймгийн онцгой комиссоос мэдээлэл хийлээ.

Тус аймгийн Засаг дарга О.Батжаргал “Гэмт этгээдийн балмад үйлдлийн хохирогч болсон охины ар гэрийнхэнд гүн эмгэнэл илэрхийлье. Охиныг эрэн хайх ажиллагаанд онцгой комисс болон аймгийн хэмжээнд үйл ажиллагаа явуулдаг аж ахуйн нэгж байгууллагууд нэгдэн үйл ажиллагаа явууллаа. 2023 оны аравдугаар сарын 3-нд 07:10 цагийн үед охин хичээлдээ явахаар гэрээсээ гарсан. Дуудлага ирсэн даруйд цагдаагийн болон холбогдох албаныхан ажилласан. Улмаар тухайн өдрийн 20:00 цагийн үед аймгийн онцгой комиссоос дэмжлэг үзүүлж, эрлийн багийг өргөтгөсөн.

23 байгууллагын 245 алба хаагчийг дайчлан 89 тээврийн хэрэгслээр эрэн хайх ажлыг эхлүүлсэн. Мөн 13 сумын онцгой комиссыг хуралдуулж, эрэн хайх ажил дайчилсан. Аравдугаар сарын 4-нд өглөөний 3:30 цагийн байдлаар нийт 78 алба хаагч 18 техник хэрэгсэлтэй Дорноговь аймгийн Сайхандулаан, Мандах, Өмнөговь аймгийн чиглэлд гаргасан. Өнөөдрийн 3:00 цагт эрэн хайх ажлыг дуусгаад ирлээ. Аймгийн онцгой байдлын ажилд УИХ-ын гишүүд болон улсын Онцгой байдлаас агаараас эрэн хайх ажилд дэмжлэг үзүүлж нисдэг тэрэг гаргаж өгсөн. Улмаар аравдугаар сарын 4-нд 16:00 цагийн үед гэмт этгээдийг Өмнөговь аймгийн Манлай сумын нутаг дэвсгэрээс тээврийн жолооч нарын дэмжлэгтэйгээр саатуулж, баривчилсан.

Гэмт хэрэгтэн баригдсан ч хохирогчийг олох ажилд саад учруулж мөрдөн байцаах ажилд хугацааг хойшлуулах зорилготой олон талын худал мэдүүлэг өгсөн. Аравдугаар сарын 6-нд дахин эрлийн багийг нэмж хохирогчийг олсон. Мөрдөн шалгах ажилтай холбоотой мэдээллийн цагдаа прокурорын байгууллага өгнө” гэлээ.