Алга болсон 12 настай хүүхэдтэй холбоотой асуудлаар ЦЕГ, ХНХЯ, ГБХЗГ-аас мэдээлэл хийлээ.

         Энэ үеэр Хөдөлмөр нийгмийн хамгааллын сайд Х.Булгантуяа “Бид Цагдаагийн ерөнхий газар, аймгийн Засаг дарга, хүүхэд хамгааллын хамтарсан багийн дарга болон аймгийн Онцгой байдлын даргатай бид хэрэг үүссэн цагаас хамтран ажиллаж байна. Улсын хэмжээнд нэг сая 200 мянган хүүхэдтэй. Хүүхэд хамгааллын байгууллага хүүхэд хамгааллын асуудлыг шийдвэрлэхээс гадна Боловсролын яам, Эрүүл мэндийн яам, Цагдаагийн газар хамтран ажиллах хэрэгцээ шаардлага байна гэдгийг сүүлийн үед гарч байгаа гэмт хэрэг, осол харуулж байна. Дунджаар 1500 орчим хүүхэд гэмт хэргийн хохирогч болж байна. 108 дуудлагад гэхэд эхний найман сараар 70 мянган орчим дуудлага байсан байхад 50 орчим хувь нь зорилтот дуудлага, бусад дуудлага харьцангуй гайгүй. Цаашид бид хүүхэд хамгааллын чиглэлээр байгууллагуудтай хамтран ажиллах, хүчирхийллийн гэмт хэрэг үйлдсэн хүний хэрэг нь тогтоогдвол тухайн хүнийг олон нийтэд зураг, нэртэй нь зарлах байдлаар хатуу тэмцэнэ. Мөн шилжих хөдөлгөөний дунд хүүхдүүд бүртгэлгүй хохирч үлдэх гээд байдаг. Тиймээс хүүхэд бүрд цахим хувийн хэрэгтэй больё. Ингэснээр эцэг, эх нь ямар нэгэн зөрчил гаргахад тухайн хүүхдийн хувийн хэрэг дээр мэдээлэл үүсэж байдаг, багш, эрүүл мэндийн байгууллага анзаарах ёстой. Иргэд олон нийтээс хүсэхэд, хүүхэд хамгааллын ажилд томоохон мэдээлэл сурталчилгааны ажлыг зайлшгүй хийх шаардлагатай байна. Хүүхдээ бид анхаарахаас гадна хүүхэд өөрөө, найз нөхдөө хэрхэн яаж хамгаалах дээр хамтын ажиллагааг чухал. Хөдөлмөр нийгмийн хамгааллын агентлагийн Гэр бүл, хүүхэд, залуучуудын газрын төсвийг тооцоход Монголын нэг хүүхдэд оногдож байгаа төсөв 5000 төгрөг байдаг. Нийт хүүхдийн 400 гаруй нь нийгмийн халамжид байдаг хүүхдүүд гээд авахаар нэг хүүхдэд оногдож байгаа төсөв 15 мянга байгаа. Тиймээс 2024 оноос найман тэрбумын төсвийг 14 тэрбум төгрөг болгох төсвийг УИХ-д өргөн барьсан. Ингэж бид хүүхэд хамгааллын ажлыг хийх боломж бололцоо бий болно" гэв.