Нийслэлийн парк шинэчлэлтэй холбоотойгоор “Тэнүүн-Огоо” ХХК БНСУ-аас 600 шинэ автобус оруулж ирэхээр болсон. Улмаар эхний ээлжид орж ирсэн 100 автобусыг олон нийтэд танилцуулахад стандартын шаардлагад нийцэхгүй, эвдэрсэн, хуучин автобусыг засаж, янзлаад нийлүүлсэн байж болзошгүй гэх маргаан өрнөөд буй.

Мөн үүнтэй холбоотойгоор Засгийн газрын сайд, Улаанбаатар хотын түгжрэлийг бууруулах Үндэсний хорооны дарга Ж.Сүхбаатар, Нийслэлийн Засаг дарга бөгөөд Улаанбаатар хотын захирагч Д.Сумъяабазар нар ёс зүйн хариуцлага хүлээж, албан тушаалаасаа чөлөөлөгдөх хүсэлтээ өгөөд байгаа юм. Ингэхдээ хот хариуцсан сайд Ж.Сүхбаатар, хотын дарга Д.Сумъяабазар “Парк шинэчлэлтэй холбоотой автобус орж ирсэн ажлыг би мэдэхгүй. Би оролцоогүй. Д.Амарбаясгалан дарга мэднэ. Д.Амарбаясгалан дарга уулзуулж өгсөн” гэх утгатай  мэдээлэл хийгээд байгаа. Тэгвэл үүнтэй холбоотойгоор ЗГХЭГ-ын дарга Д.Амарбаясгалан Засгийн газрын хуралдаанаас гарсан шийдвэрийг танилцуулах үеэрээ мэдээлэл өглөө.

                            Тэрбээр “Би “Тэнүүн-Огоо” ХХК-ийн захирал А.Ганхуяг гэж хүнтэй уулзаж үзээгүй. Парк шинэчлэлтэй холбоотой асуудлаар хуралдаж байхад нийтийн тээврийн холбооны тэргүүн гэж надтай уулзсан. Тэгэхэд Засгийн газрын сайд, Улаанбаатар хотын түгжрэлийг бууруулах Үндэсний хорооны дарга Ж.Сүхбаатар байсан. Би Ерөнхий сайдын үүрэг чиглэлийн дагуу Ж.Сүхбаатар сайд нарын хүмүүст нийтийн тээврийн салбарт либералчлах бодлого барих нь зөв гэх байр суурь илэрхийлсэн юм. Харин түүнээс хойш Ж.Сүхбаатар сайд парк шинэчлэлийн 320 тэрбум төгрөгийн ажлыг нийслэл рүү шилжүүлж, тендер зарлаад энэ ажил эхэлсэн юм билээ” гэв.