ИРГЭДЭЭ ДОРОМЖЛОХООС ӨӨРИЙГ ЧАДДАГҮЙ ГИШҮҮДИЙН ЭГНЭЭГ НЭГЭЭР НЭМСЭН Г.ДАМДИННЯМ

      УИХ-ын гишүүн Г.Дамдинням харсан болгондоо хошуу дүрж, хаа хавирахгүй дэмий явдалд цаг үеэ мэдрээгүй, тохиромжгүй тайлбар бичиж цахим хуудаст оруулдагаараа олонд ад үзэгддэг боллоо. Бичсэнтэй нь холбоотой хэдэн сөрөг сэтгэгдэл ирсэн даруйд тайлбараа устгадаг түүний туйлбаргүй зан нь засраагүй бололтой. Тухайлбал, олны бухимдлыг хүргэсэн түүний хамгийн сүүлийн жишээ бол ногоон автобусыг болон автобусны компанийг ганцаараа өмөөрч бичсэн нь юм. Тэрбээр “Хувийн компани ашгийн төлөө л явна. Хог авчраад шинэ гэж шахах бол тэдний л асуудал. Бүрэн буруутгах аргагүй. Хамгийн гол нь, ямар албан тушаалтан тухайн автобусыг “Ямар ч асуудалгүй, шинэ” гэж хүлээн авчихаад нийтийн тээвэрт явуулах гээд байсан юм бэ. Түүнд нь хариуцлага тооцох нь зүйтэй” хэмээн твиттер хуудастаа жиргэсэн байв. Иргэд түүний бичсэн дээрх жиргээг ихэд шүүмжилж, “Улсдаа хог авчрахыг зөвшөөрлөө. Хэн дуртай нь энэ улсад хог авчирч, иргэдийг дарга нартай нь хамт хуураад “Цоо шинэ” гээд зарж, зах зээлд нийлүүлж болно гэж үү. Энэ улс хог цуглуулдаг цэг биш. Эзэнгүй юм шиг аашлахаа боль” зэргээр бухимдлаа илэрхийлж байсан. Гишүүнийхээ хувьд ч, хувь хүн талаасаа ч сүүлийн 10 хоногт ногоон автобусыг өмөөрсөн ганц хүн нь Г.Дамдинням болж, хэсэг баалууллаа. Тэрбээр хүмүүсийг ч тоглолт аятайхан үзүүлчихдэггүй донгосдог гишүүн. “Татар” хамтлагийн тоглолтын үеэр “Татар” хамтлагийнхан Төв цэнгэлдэх хүрээлэнг дүүргэж байгаад “тас” авчээ. Яалт ч үгүй манай 80-аад оныхны амьдрал тогтож, дурсамждаа мөнгө зарцуулдаг тасалбарын мөнгөтэй болж” хэмээх утгатай 1980-аад оныхныг доромжилсон сэтгэгдэл бичиж, олон нийтэд “алуулах шахаад” түүнийгээ устгасан байдаг.

Г.ДАМДИННЯМ ГИШҮҮНИЙГ ДАРХАН-УУЛ АЙМАГТ ХИЙСЭН АЖЛААР НЬ ДҮГНЭВЭЛ ЯМАР ОНОО АВАХ ВЭ

    Мөн өнгөрсөн хаврын Байнгын хорооны хуралдааны үеэр “Боломжтой нь дэлхийн хэмжээнд, боловсролгүй нь нөгөө “ул”-ндаа үлдэж байна” хэмээсэн нь иргэдээ доромжлохоос өөрийг чаддаггүй гишүүдийн эгнээг нэгээр нэмсэн. Ингээд түүний “балай”  үгнүүдийг түүсээр байвал хэтэрхээр байна. Харин тэр энэ, тэндэхийн асуудалд хошуу дүрж явахынхаа оронд тойрогтоо нүдэнд харагдаж, гарт баригдахаар дорвитой ажил хийсэн үү.  Үер, ус татарсны дараа хэдэн гишүүн “Үерийн голомтод ажиллаж байна” гээд өөрсдийнхөө зургийг түмэнд түгээсэн. Харин Г.Дамдинням гишүүүн тэдний тоонд орчихсон Дархан-Уул аймагт очоод шалбааг дээр зургаа авхуулчихсан харагдсан. Мөн сонгуулийн сургаар сайн гишүүний нэр олж зүүх гэж ядаад тойргынхоо зах, худалдааны төвүүдээр явж, хэдэн хүнээр хүрээлүүлж байгаад мөн л зургаа нийтэлсэн нь түүнийг хэлбэр төдий гишүүн гэдгийг нь илтгэх аж. Харин түүнийг Дархан-Уул аймагт хийсэн ажлаар нь дүгнэвэл дараагийн сонгуулиар ямар оноо авах бол. 

    Г.Дамдинням Канадын Бритишийн Колумбиа их сургуульд хоёр жил уул уурхайн нийгмийн хариуцлага мэргэжлээр суралцахдаа Боловсролын зээлийн сангаас 32 мянган ам.долларын зээл авсан нь ил болж байсан. Бас тэрбээр Хөгжлийн банкны хэрэгт нэр холбогдсон дуулианы эздийн нэг болсон. Боловсролын зээлийн сангаас зээл авсан талаараа тэрбээр “Би 10 жилийн өмнө төрд нөлөөгүй байсан. Бүх шаардлагаа хангаад л зээлээ авсан. Улсдаа таван жил ажилласан. Үүнийг улстөржүүлэх шаардлагагүй. Тухайн үед надад улстөржилгүй зээл олгосон Л.Гантөмөр сайдад баярладаг” хэмээж байв. Ийн түүнд оролцоогүй хэрэг тун цөөн аж.