Нийслэлийн Засаг дарга бөгөөд Улаанбаатар хотын захирагч Д.Сумъяабазар, Түгжрэлийн сайд Ж.Сүхбаатар нар өчигдөр өөрсдийн хүсэлтээр үүрэгт ажлаасаа чөлөөлөгдөх өргөдлөө өгсөн. Харин өнөөдрөөс тэдний оронд хэн томилогдох вэ гэдэг таамаг олны дунд өрнөж байна. Олон нийтийн сүлжээнд цацагдснаар Хууль зүй, дотоод хэргийн сайд Х.Нямбаатарыг хотын даргаар, Хууль зүй, дотоод хэргийн сайдад Б.Энхбаярыг, Түгжрэлийн сайдаар УИХ-ын гишүүн Б.Дэлгэрсайхан, Баянзүрх дүүргээс сонгогдсон Э.Бат-Амгалан нарын нэгийг томилохоор тохирсон гэх мэдээлэл бий. Харин энэ талаар Хууль зүйн Байнгын хорооны дарга Б.Энхбаяр “Би Х.Нямбаатар сайдыг ажлаа сайн хийж байгаа гэж боддог. Би Ерөнхий сайдтай уулзаагүй байна.  Бүлгийн хуралдаанаар энэ талаар огт яриагүй. Сайдын ажил тийм амар биш. Нэг өдөрт 1000 бичиг, цаасны ажил орж ирдэг, цар хүрээ томтой яам. Х.Нямбаатар тулдаа л биелүүлж ажилладаг болов уу гэж боддог. Ерөнхий сайдад түшиг болж байгаа сайн сайд гэж боддог” гэв.