Нүүрсний гэх тодотголтой 11 хүнд холбогдох эрүүгийн хэргийн урьдчилсан хэлэлцүүлэг болж, тэдэнд холбогдох хэргийн гэм буруугийн шүүх хурлыг есдүгээр сарын 28-ны өдөр буюу өнөөдөр хийхээр товлосон. Өнгөрсөн долоо хоногт УИХ-ын гишүүн асан Т.Аюурсайхан, "Эрдэнэс Тавантолгой" ХК-ийн гүйцэтгэх захирал асан Б.Ганхуяг нарын 11 хүнд холбогдох хэргийг хэлэлцэж, гэм бурууг шүүх хурлын товыг тогтоосон юм.

Тэгвэл шүүх хурлаас хойш Б.Ганхуягийн биеийн байдал муудаж, эмнэлэгт хүргэгдсэн байдаг. Тодруулбал, түүний даралт унаж, толгой нь нь хавагнаж, бөөлжиж, биеийн байдал нь муудсан учир Хорих 461 дүгээр ангийн нэгдсэн эмнэлэгт хэвтүүлэн эмчилж байгаа.

Эх сурвалжаас авсан мэдээллээр Б.Ганхуягийн биеийн байдал тогтворжиж, даралт нь хэвийн болжээ. Мөн шинжилгээний хариугаар нойр булчирхайн архаг өрөвсөлтэй, бөөр, зүрх, уушги өөрчлөлттэй гэж гарсан ажээ. Ямартай ч Б.Ганхуягийн биеийн байдал тогтворжсон учир шүүх хуралдаа оролцоно гэнэ.