ЗТХЯ-ны өмнө талбайд тус яамны Хяналт шинжилгээ, үнэлгээ, дотоод аудитын газрын дарга Т.Гомбосүрэн  2018 оны наймдугаар сарын 9-нд бусдын гарт амиа алдсан байдаг. Эл хэрэгт ЗТХЯ-ны Төрийн захиргаа удирдлагын газрын дарга асан Б.Махбалыг саатуулан шалгаж, түүнийг талийгаачийн аминд хүрсэн болохыг тогтоосон юм. Тус хэргийн шүүх хурал өнгөрсөн 2020 оны тавдугаар сард болж, шүүхээс Б.Махбалд 13 жилийн хорих ял оноосон билээ. Харин Давж заалдах шатны шүүх 11 жил болгон өөрчилсөн юм.

Мөн Ерөнхийлөгч асан Х.Баттулга бүрэн эрхийнхээ хугацааг дуусахаас ердөө хэдхэн хоногийн өмнө зарлиг буулгаж, хорих ял эдэлж буй 13 хүнд өршөөл үзүүлсэн байдаг. Тодруулбал, ТЕГ-ын дарга асан Б.Хурц, УИХ-ын гишүүн асан Д.Дамба-Очир, Г.Махбал нарын 13 хүнд өршөөл үзүүлж, суллахаар болсон юм. Тухайлбал, хүн амины хэргээр ял эдэлж байсан Зам тээврийн хөгжлийн яамны газрын дарга асан Б.Махбалын эдлээгүй ялынх нь 25 хувь буюу 2.5 жилийн ялыг хөнгөлөх уучлал үзүүлсэн байдаг.

Тэгвэл хүн амины хэрэгт ял эдэлж, 11 жилийн хорих ял сонссон Б.Махбалыг өчигдөр орой Хорих 461 дүгээр суллажээ.

Энэ талаар ШШГЕГ-ын дарга, хурандаа О.Амарсанаагаас тодруулахад “Б.Махбалыг Багануур дүүргийн Эрүүгийн хэргийн Анхан шатны шүүхээс магадлангаар суллах шийдвэр гарсан юм билээ. Гэхдээ одоо прокурор эсэргүүцэл бичиж, дараагийн шатны шүүх хурал болно гэсэн. Гэхдээ бид шүүхийн шийдвэр гарсан учраас өчигдөр орой Б.Махбалыг Хорих 461 дүгээр ангиас сулласан” гэлээ.

Багануур дүүрэг дахь хорих ангийн удирдлагаас Б.Махбалыг засрал хүмүүжлийг олсон гэсэн дүгнэлт бичиж, хугацаанаас нь өмнө тэнсэн суллуулахаар хандсаныг Багануур дүүргийн Эрүүгийн хэргийн анхан шатны шүүхийн шүүгч хүлээн аваад, суллах захирамж гаргасан нь энэ аж.