Гадаадын иргэнд 21 га газар олгосон талаар “Тэнгэрлэг Монгол” ТББ олон нийтэд мэдээлсэн байдаг. Тэгвэл түүнийг уг мэдээллийг олон нийтэд хүргэсэн гэх шалтгаанаар хууль хяналтын байгууллагаас шалгаж эхэлжээ. Энэ талаар “Тэнгэрлэг Монгол” ТББ-ын гүйцэтгэх захирал Б.Бямба-Очир, Хан-Уул дүүргийн ИТХ-ын төлөөлөгч, “Сайн” намын дарга Б.Жагар, хуульч, судлаач Д.Нямсамбуу нар мэдээлэл хийлээ.

Хэвлэлийн бага хурлын үеэр тэд дараах байр суурийг илэрхийллээ.

“Тэнгэрлэг Монгол” ТББ-ын гүйцэтгэх захирал Б.Бямба-Очир “Уул ус, газар нутгийнхаа төлөө явсныхаа үр дүнд хуулийн байгууллагад шалгагдаж байна. Сүхбаатар дүүргийн иргэдийн аюулгүй байдал зөрчигдөж байна гээд Засаг даргадаа удаа дараа шаардлага хүргүүлэхэд үл ойшоосон. Гадаадын иргэнд олгосон булаг шандтай газар барилгын хог асгаж, дараагаар нь тэгшилж байгаад барилгаа барьж байна . Бид улсынхаа 21 га газрыг авч үлдмээр байна” гэв.

Хуульч, судлаач Д.Нямсамбуу “Гадаадын иргэнд хууль бусаар олгосон ойн цоорхойдох газарт тэд байшин барилга бариад эхэлчихсэн. Уг хууль бус газар олготод жинхэнэ ял, хариуцлага хүлээх ёстой хүн нь зөвшөөрөл олгосон хүн. Гэтэл тэр хүн сул чөлөөтэй явж байна. Харин үзэл бодлоо илэрхийлсэн Б.Бямба-Очир яагаад хариуцагчаар татагдаад цагдаа, шүүхэд дуудагдаад явж байгаа юм бэ. Энэ асуудлыг нийгэмд гаргаж ирсэн хүн нь Б.Бямба-Очир болохоос биш, тэр ял, шийтгэл авах үйлдэл хийгээгүй. Зөв дугарч байгаа залуусаа зоригийг нь мохоодог ялалдаг байдлаа зогсоох хэрэгтэй” гэв.

Б.Сувданзаяа