УУХҮЯ-ны Газрын тосны бодлогын газрын дарга Б.Анхбаяр шатахуунтай холбоотой мэдээлэл хийлээ.

Тэрбээр “Өнгөрсөн долоо хоногийн баасан гарагт буюу  энэ сарын 22-нд ОХУ-ын Засгийн газраас дотоодын хэрэглээ болон үнийн өсөлтийн эсрэг хэрэгжүүлж байгаа арга хэмжээний хүрээнд газрын тосныхоо зарим нэг бүтээгдэхүүн болон авто бензиний экспортыг тодорхой хугацаагаар хязгаарлаж байгаа талаар мэдээлсэн. Үүнтэй холбоотойгоор Монгол Улсын өргөн хэрэглээний автобензин болох АИ-92 болон дизель түлш гаалийн кодоороо хязгаарлалтад орсон.

Өнгөрсөн амралтын өдрүүд Оросын Холбооны Улсын хурлын Думын дарга В.В.Володин Монгол Улсад айлчлан ирсэн. Энэ айлчлалын хүрээнд тус улсын Засгийн газрын тогтоолд Монгол Улс хязгаарлалтад орохгүй гэдэг мэдээллийг өгсөн байна. Үүний хүрээнд УУХҮ-ийн яамнаас цаашид ОХУ-ын шатахуун экспортлогч компаниудтай яаж харилцах талаар, яаж бүтээгдэхүүнийг хэвийн үргэлжлүүлэх талаар Оросын Холбооны Улсын Эрчим хүчний яам руу албан захидал хүргүүлэхээр ажиллаж байгаа юм байна. Албан захидлыг өнөөдөр 14:00 цагт буюу ОХУ-ын нийслэл Москва хотод өглөө ажил эхлэх үеэр энэхүү захидлыг хүргүүлэх юм.

Цаашид УУХҮЯ-наас хэрэгжүүлж байгаа арга хэмжээний хүрээнд Монгол Улсад шатахууны болон авто бензиний нөөцийг таслахгүй байх арга хэмжээг авч ажиллаж байна. Засгийн газрын хэрэгжүүлж буй арга хэмжээний хүрээнд 161 дүгээр тогтоолоор нөөцийн хэмжээг баталсан байдаг. Үүнд Монгол Улсын хэмжээнд шатахуун болон бензиний 30 хоногийн нөөцтэй байхаар тогтсон. Энэ 30 хоногийн нөөцийг одоогийн байдлаар барьсан буюу хэвийн нөөцтэй ажиллаж байна” хэмээн мэдэгдлээ.  

Энэ үеэр мөн УУХҮЯ-наас шатахууны импортыг тасалдуулахгүй байх арга хэмжээг яаралтай хэрэгжүүлж ажиллана гэдгээ мэдэгдлээ. Өнөөдрийн байдлаар Монгол Улсын хэмжээнд дизель түлшний 40 орчим хоногийн нөөцтэй, АИ-92 бензиний 30-аас дээш хоногийн нөөцтэй байгаа гэдгийг мэдэгдээд байгаа юм.

Б.Сувданзаяа