“Шувуу” ажиллагаагаар сугдуулж ирэх дараагийн “хэрэгтэн” нь УИХ-ын гишүүн Ш.Раднаасэд, “Эрдэнэс тавантолгой” ХК-ийн гүйцэтгэх захирал асан Д.Ариунболд нарын хамтрагч, зүсээ хувилган зугтсан Д.Наранхүү ажээ. Түүнийг маргааш эх оронд нь шилжүүлэн авчрахаар АТГ-ын мөрдөгчид, Гадаадын иргэн харьяатын холбогдох албан тушаалтнууд БНХАУ руу нисжээ. Маргааш өглөөний нислэгээр тэд ирж, Д.Наранхүүг цагдан хорих арга хэмжээг авах талаар эх сурвалж мэдээллээ.

Засгийн газрын “шувуу” ажиллагааныхан Д.Наранхүүгийн араас хагас жил орчим хөөцөлдөж, өнгөрсөн зургадугаар сард Солонгост байгаа сургийг нь гаргасан байдаг. Тодруулбал, өнгөрсөн зургадугаар сарын 5-нд Хууль зүй, дотоод хэргийн сайд Х.Нямбаатар “Нүүрсний хулгайн хэрэгт шалгагдаж байхдаа БНХАУ руу оргон зайлсан иргэн Д.Наранхүү БНСУ-д очсон мэдээлэл бидэнд ирсэн. Түүнийг баривчилж авчрахаар ажиллагаа явуулж эхэлсэн” гэж байлаа. Тэгвэл өнгөрсөн долоо хоногийн баасан гарагт Д.Наранхүүг баривчилсан. Шанхай, Макао, Солонгосоор дамжин орогнож байсан Д.Наранхүү пластик мэс заслаар нүүр царайгаа өөрчлөн зүсээ хувилгасан байсан бөгөөд хурууны хээгээр нь Д.Наранхүү мөн болохыг баталгаажуулсан” талаар мэдэгдсэн юм.

Д.Наранхүү гэгч нь зүсээ хувилгаж, зүгээ буруулан зугтсаны учир нь тэр өдгөө “нүүрсний хулгай”-н хэрэгт яллагдагчаар татагдаад буй УИХ-ын гишүүн Ш.Раднаасэд, “Эрдэнэс тавантолгой” ХК-ийн Гүйцэтгэх захирал асан Д.Ариунболд хоёрын гол хамтрагч байсан. Тиймдээ ч Д.Наранхүү баривчлагдана гэдгээ эртнээс тооцоолж байсан бөгөөд “Эрдэнэс тавантолгой” ХК-ийн гүйцэтгэх захирал асан Б.Ганхуягийг баривчлагдсаны яг маргааш нь буюу 2022 оны арванхоёрдугаар сарын 9-нд БНХАУ руу гарч зугтсан байдаг. Харин маргааш Д.Наранхүүг баривчлан ирж, байцаалт өгч эхэлснээр УИХ-ын гишүүн Ш.Раднаасэд, “Эрдэнэс тавантолгой” ХК-ийн гүйцэтгэх захирал асан Д.Ариунболд нарын “нүүрсний хулгай”-н хэрэг илрэх бололтой.

Д.Наранхүүтэй холбоотой дэлгэрэнгүй ноцтой баримтыг энд дарж уншина уу. https://ergelt.mn/news/22/single/36963