Засгийн газрын хуралдаанаас гарсан шийдвэрүүдийг танилцуулж байна.  Энэ үеэр  Сангийн сайд Б. Жавхлан мэдээлэл хийлээ.

    Тэрбээр “Өнгөрсөн хоёр долоо хоногийн хугацаанд Ерөнхий сайд болон түүний баг орон нутгаар явлаа. Ингэхдээ орон нутгийн хөрөнгө оруулалт, төсвийн хэрэгжилт ямар байгаа тал дээр ажиллаа. Өнөөдөр Ерөнхий сайд дээр олон жил дуусаагүй байгаа барилгын ажлуудын талаар мэдээлэл өглөө.

  Одоогоор улсын хэмжээнд 736 төсөл арга хэмжээ төсвийн хөрөнгө оруулалтаар баригдаж байна. Онцгой анхаарал татсан буюу наймаас дээш жил үргэлжилж, хэд хэдэн удаа үнийн хүсэлт төсөвт суугдсан өнөөдрийг хүртэл дуусаагүй буй 25 төсөл арга хэмжээ байна. Эдгээрийг яаралтай дуусгах үүрэг бүхий Шадар сайд С.Амарсайханаар ахлуулсан ажлын хэсэг байгуулагдаж, долоо хоногийн хугацаатай ажиллахаар боллоо. 

  Эдгээр хугацаа алдсан төслүүдийн 60-70 хувь нь захиалагч буюу төрийн буруугаас болсон. Мөн ТЭЗҮ дутуу, барилгын зураг төсөл удааширсан гэх асуудал байна. Цаашдаа нэгдүгээр сарын 1-нээс хэрэгжиж эхлэх Төрийн худалдан авах ажиллагааны тухай хуулийн дагуу зөвхөн зураг төсөл болон бэлтгэл ажил бүрэн хийгдсэн төслүүдийг л авна. Нэгэнт  гэрээлээд авсан бол гэрээний зөрчил гаргахгүй заасан хугацаанд амжилттай дуусгаж байх шаардлагыг өндөржүүлнэ. Мөн төрөөс өгөх дэмжлэгийг хүнд сурталгүй үзүүлэх чиглэлийг өглөө.  Одоогоор 45 компани тендерт оролцох эрхээ хасуулсан.  Мөн захиалагчаас ирсэн саналын дагуу 107  аж ахуй нэгж тендерт оролцуулахгүй байх санал ирсэн. Үүнийг аравдугаар сарын сүүл гэхэд хянаж дуусаад, “хар” жагсаалтад оруулах эсэхийг шийднэ. Төсвөөс их хэмжээний хөрөнгө гарсан ч гацсан төслүүдийг яаралтай дуусгана” гэлээ.