Улсын хилийг татаж, хятадуудад зарсан тухай мэдээлэл өнгөрсөн наймдугаар сарын сүүлчээр цацагдсан байдаг. Мөн иргэдийг зэвсэгт бослогод уриалж, тэмцэхийг шаардсан билээ. Тэгвэл уг хуурамч мэдээллийг олон нийтэд цацаж, иргэдийг зэвсэгт бослогод уриалсан этгээдийг олж илрүүлжээ.

Тодруулбал, “Монгол Улсын урд хил орчимд байрлах хилийн цэргийн анги, салбарыг нутгийн гүн рүү шилжүүлсэн, улсын хилийн зурвас газраас хөрш зэргэлдээ улсад шилжүүлсэн” гэх мэдээлэл 08 дугаар сарын 30-ны өдөр олон нийтийн сүлжээнд түгсэн.

Тухайн үед Үндэсний аюулгүй байдлын зөвлөлийн вэбсайтад “...Үндэсний эв нэгдлийг зориуд хагалган бутаргах санаа зорилго бүхий, хоёр орны харилцаанд сэв суулгаж болзошгүй илт худал, хортой мэдээллийг зориуд зохион байгуулалттайгаар бэлтгэсэн, олон нийтийн нийгмийн сүлжээнд түгээсэн хүн, бүлэг этгээдийг олж тогтоох, үндэсний аюулгүй байдалд харшлах үйлдлийг таслан зогсоох зорилгоор хууль хяналтын байгууллагаас холбогдох шалгалтын ажиллагааг хийж байна” хэмээн мэдээлсэн билээ.

Тэгвэл хуурамч мэдээллийн мөрөөр тагнуулын байгууллага ажиллаж, үг үйлдлийг хуурамч хаягаар үйлдсэн болохыг тогтоожээ.

Улмаар олон нийтийн сүлжээн дэх 20 мянган дагагчтай хаяг, мөн хуурамч хаяг ашиглан зэвсэгт бослогод уриалж, хуурамч мэдээлэл тараасан 26 настай иргэн Б-г энэ сарын 14-ний өдөр Баянхонгор аймагт албадан саатуулсан байна. Иргэн Б нь Баянзүрх дүүрэгт оршин суух хаягтай бөгөөд түүнийг одоогоор 461 дүгээр ангид саатуулжээ.