УИХ-ын чуулганы үдээс хойших хуралдаан Хүний эрх хамгаалагчийн эрх зүйн байдлын тухай хуулийн төсөл болон хамт өргөн мэдүүлсэн хуулийн төслийг хэлэлцүүлгээр үргэлжилж байна. Хуулийн төсөлтэй холбоотой гишүүд асуулт асууж, үг хэлж байна. 

УИХ-ын гишүүн Л.Энх-Амгалан: Хүний эрх гурван шалтгаанаар зөрчигддөг гэсэн судалгаа бий. Тодруулбал, дайн байлдаантай, шашны мөргөлдөөн, улс төрийн хатуу дэглэмтэй улсад эрх нь зөрчигддөг. Гэтэл манайд аль нь ч байхгүй. Харамсалтай нь, дайн байлдаантай улсаас илүү хүний эрх зөрчигдөж, амиа алдаж байна. Наад зах нь үйлдвэрийн осол, зам тээврийн ослоор олон хүн  энддэг. Хүний эрхийн комисстой холбоотой хууль баталж, шүдгүй арсланг шүдтэй болгосон. Харин хүний эрхийг хамгаалж байгаа тогтолцоог Монголын хөрсөнд буулгамаар байгаа юм гэв.

Хууль санаачлагч УИХ-ын гишүүн Д.Цогтбаатар: "Энэ хуулийн төслийг би тодорхой шаардлага тавьж байгаад хүлээж авсан. Хүний эрхийн комиссын хүрч чадахгүй байгаа саарал орон зайг нөхөх хэрэгтэй байгаа. Тиймээс хүний эрхийн хороо байгуулж, бодитоор ажиллах нөхцөлийг нь бүрдүүлж байгаа юм. Хоёрдугаарт, хүний эрхийн комисс дангаараа энэ ажлыг хийж чадахгүй. Хүний эрхийг хамгаалах нь зөвхөн төрийн ажил бус. Төрийн бус байгууллага болон компаниуд оролцоотой байх ёстой.