Ерөнхий сайд Л.Оюун-Эрдэнэ Дархан, Эрдэнэт зэрэг аймгуудад албан уулзалт хийж байгаа билээ. Тэрбээр иргэдтэй уулзах үеэрээ “Яагаад бид Эрдэнэтийн 49 хувийг авч, Хөгжлийн банкыг дэлбэлэх болов. Яагаад бид Дубайн гэрээг цуцлаж, Хөтөлийг хурааж авах болов. Дарханы Төмөрлөгийн үйлдвэрийн концессыг цуцлав. Яагаад гэвэл манайд болж байгаа бүх асуудлын 93 хувь нь уул уурхайтай холбоотой байгаа. Уул уурхайн эзэд бол банкны эзэд. Тийм учраас манай нийт хөрөнгийг уул уурхайн хэдхэн компаниуд барьдаг. Энэ хүмүүс зарим тохиолдолд хоёр намыг хоёуланг нь худалдаад авчихдаг. Энэ хүмүүс заримдаа шүүхийг тэр чигээр нь томилчих тохиолдол байна. Эдгээр хүн заримдаа шүүхийг томилчих явдал байна. 1.5 жилээр Засгийн газар солигдоод байснаас аль ч намын үед хүмүүс нь солигдоогүй. Аль нам засагласан энэ хүмүүс л ард байна. Үүнийг МАНАН тогтолцоо гээд байгаа юм.

Дарханы төмөрлөгийн үйлдвэрийн концесс өөрөө төмөрийн хүдэр барих гэсэн концесс биш байсан. Энэ бол Төмөртэйн төмөр, Төмөртэй Хустай хоёрыг авч экспортлох хэлцэл байсан. Шулуухан хэлэхэд Ерөнхийлөгч Ц.Элбэгдоржийг Ерөнхийлөгчийн сонгуульд өрсөлдөхөд санхүүжүүлсэн компани Ерөнхийлөгч болсных нь  дараа Хэнтийн Бор-Өндөрийг, Дарханы Төмөрлөгийг, “Эрдэнэт үйлдвэр”-ийг, Монголросцветметийг авч, сонгуульд өгсөн хандиваа хэд дахин босгож авсан Мексиктэй адилхан авлигын систем байсан. Үүнд тухайн үеийн  ТЕГ-ын дарга, Аж үйлдвэрийн сайд, Монголбанкны Ерөнхийлөгч, Засгийн газар нь тэр чигтээ оролцсон. Төрөөс дээгүүр төр байсан. Төрийн мөнгөөр хувь хүн авав гэдгийг бодож үзэх хэрэгтэй. Монгол Улсад шудрага ёс гэж байдаг бол шүүхийн төрх эхнээсээ ил болж байна. Г дээрээ гэдийнэ гэдэг шиг томилсон шүүгч нар нь том болчихсон. Удахгүй авлигачид их орилно. Ч.Сайханбилэг, Д.Эрдэнэбилэг гараад зугтчихсан. Удахгүй тэдний олно авч ирнэ. Эндээс санхүүжүүлж байгаа хүмүүсийг таслан зогсооно. Цаг хугацаа тэдний эсрэг зогсож байгаа. Ард түмэн, Засгийн газар мөнгөний массыг өрөвдөж, ухарч болохгүй. Та хэдэд захиж хэлэх ганцхан юм байна. Гараад явчихсан Б.Эрдэнэбилэгийгээ, Ч.Сайханбилэгтэйгээ аваад надтай уулзуул. Та нар шиг төлөөний хүмүүстэй би уулзахгүй.  Энэ схем дээр байгаа Мишиг гэж хүн бол Батсуурь шүүгчийн аав. Батсуурь бол Засгийн газрын шийдвэр бүхнийг хянадаг Захиргааны танхимын тэргүүн шүүгч. Асуудал ингэж л явдаг. Тийм учраас бид шүүхтэй асуудал болоод байгаа юм. Үндсэн хуульд Монгол Улсын шүүх эрх мэдлийг гагцхүү шүүх хэрэгжүүлнэ гэж заасан байдаг. Гэхдээ хоёр дахь өгүүлбэрт шүүгч хараат бус байж, гагцхүү хуульд захирагдана гэж заасан байдаг. Шүүгч хараат бус байж, гагцхүү хуульд захирагдахгүй байгаа учраас өнөөдөр бид парламент дээр шүүхтэй холбоотой асуудлыг ярихаас өөр аргагүй болж байгаа. Яагаад энгийн иргэд найман ишигний хэргээр шийтгэгдэж байхад Б.Эрдэнэбилэг гэдэг хүний хэргийг шүүх долоон жил гацаах ёстой юм. Яагаад ард түмний хүүхдэд арслан бар мэт загнадаг хэрнээ авлигачдын хэргийг яагаад бүтэн таван жил гацааж байгаа юм. Тийм учраас шударга шүүхтэй байхыг шаардах эрхтэй гэж бодож байна. Би өмнө нь хэлж байсан. Хэрвээ ордон дотор хүч мөхөствөл би Төв талбай дээр суулт хийнэ” гэлээ.