-Үйлдвэрийн ажилчдын цалинг 50 хувиар нэмэхээр төсөвт 220 гаруй тэрбум төгрөгийн ачаалал ирнэ-   

“Эрдэнэт үйлдвэр” ТӨҮГ-ын албан хаагчид өнөөдөр 7:00 цагаас ажил хаялт зарлаж буйгаа албан ёсоор мэдэгдсэн. Ингэснээр үйлдвэрийн үйл ажиллагаа бүрэн зогсоод байгаа юм.

    Энэ талаар тус үйлдвэрийн гүйцэтгэх захирал Г.Ёндон мэдэгдэл хийлээ. Тэрбээр “Миний хувьд 2019 онд ажлаа хүлээн авснаасаа хойш ээлжийн амралтаа аваагүй байсан. "Эрдэнэс Монгол” ХХК-д өвөлжилтийн бэлтгэл ажлаа тайлагнасны дараа ээлжийн амралтаа авсан. Энэ үеэр ажилчид ажил хаях талаар Үйлдвэрчний эвлэлийн хорооноос мэдэгдсэн байна. Энэ үед би байгаагүй. Ажил олгогчийн хувьд өнгөрсөн хугацаанд үйлдвэрчний эвлэлийн холбоотой хамтран баталсан дэгээ нягт баримтлан ажилласан. Энэ дэгт "Бүх талын байр суурийг хангасан арга хэмжээ авах бөгөөд арга мухардсан үед дараагийн шатны арга хэмжээг авна" гэж тэмдэглэсэн. Мөн хэлэлцээрийн явцад "Талуудаас тавьсан саналыг гадагш гаргахгүй, хэвлэлд хандахгүй" гэсэн дэгээ ч үйлдвэр сайн сахисан. Ажил хаялт зарлах хүртэл бид мэдээлэл хийгээгүй. Нийтэд энэ асуудал ил болсон учраас мэдэгдэл хийж байна.

      Ажил хаях нь хүний эрхийн асуудал ч энэ удаагийн ажил хаялтыг хууль бус гэж үзэж байгаа. Энэ хууль бус гэж тогтоогдвол сөрөг үр дагавартай учир ажил олгогчийн хувьд алба хаагч нартаа энэ талаар анхааруулга өгч, уриалга гаргасан. Үйлдвэрчний эвлэлийн дарга Ж.Мөнгөншагай нь үйлдвэрийн удирдлага ажил хаялтыг зогсонги байдалд оруулсан гэж мэдэгдсэн. Энэ нь үндэслэлгүй мэдээлэл юм. Дэгийн дагуу үйлдвэр Үйлдвэрчний эвлэлтэй зургаан удаа хэлэлцээрийн ширээний ард суусан. Үндсэн цалинг 50 хувиар нэмэгдүүлнэ гэдэг байр сууриа тэд хамгаалж, үйлдвэрийн тавьсан саналыг хүлээж аваагүйн улмаас дэгээ зөрчиж, хурлаа орхиж гарсан. Үүний дараа үйлдвэрийн зүгээс хууль зөрчсөн зүйлсийг цохон тэмдэглэж, хуулийн байгууллагад хандаад байна. Мөн Ж.Мөнгөншагай 2023 оны хоёрдугаар сард Үйлдвэрчний эвлэлийн даргын сонгуульд өрсөлдөж, сонгогдохдоо ажилчдын цалинг 50 хувиар нэмэгдүүлэх мөрийн хөтөлбөр дэвшүүлсэн. Бидний зүгээс үүнийг боломжгүй гэж удаа дараа мэдэгдсэн.

    Бид үйлдвэрийн ажилчдын цалинг 15 хувиар нэмэгдүүлэх талаар ярилцаж, Засгийн газар болон ЗГХЭГ-ын дарга Д.Амарбаясгаланг манай үйлдвэр дээр ирэхэд энэ талаар саналаа илэрхийлсэн. Мөн “Эрдэнэс Монгол” ХК-ийн тайлангийн хурал дээр ч энэ асуудлаа танилцуулсан байгаа. Улмаар 2024 онд үйлдвэрийн ажилчдын цалинг 15 хувиар нэмэх төлөвлөгөө гаргаад байсан. Түүнчлэн хэлэлцээрийн явцад шат дараатай цалинг нэмж, 2025 оноос өмнө цалин, хөлсийг 45 хүртлэх хувиар нэмнэ гэсэн саналаа илэрхийлсэн. Хурал орхиж гарснаас хойш бид хэлэлцээрээ үргэлжлүүлэх санал тавьсан ч мөн хүлээж аваагүй. Аливаа зүйл хуулийн хүрээнд явах ёстой. “Эрдэнэт үйлдвэр” ТӨҮГ нь улсын төсвийн 10 гаруй хувийг бүрдүүлдэг. 50 хувиар цалингаа нэмбэл төсөвт 220 гаруй тэрбум төгрөгийн нэмэлт ачаалал орж ирнэ. Энэ бол төсөвт маш том дарамт болно. Ажил хаялт зарлаж байгаа нь хууль бус гэдгийг анхааруулъя” гэлээ.