Өнгөрөгч намар буюу Засгийн газраас “Нүүрсний хулгай”-н хэрэгтэй тэмцэж эхэлсний дараахан УИХ-ын гишүүн С.Ганбаатар Төрийн ордонд хэвлэлийн хурал хийж “Нүүрсний хулгайг “М Си Эс”-ийн Ж.Оджаргал, “Голомт”-ын Д.Баясгалан, “Апу” П.Батсайхан нараар толгойлуулсан бүлэглэл үйлдсэн” гэж мэдэгдэж байв. Ингэж хэлэх нь ч аргагүй юм. “М Си Эс” группийн хувьд “Энержи ресурс” ХХК-аараа Өмнөговь аймгийн Цогтцэций сумын нутагт орших Ухаа худагийн нүүрсний уурхайг эзэмшдэгийг танилцуулах нь илүүц биз. Чухамдаа, нүүрсний хувийн хамгийн том уурхай бол “Энержи ресурс” ХХК-ийн Ухаа худагийн уурхай. Тэгвэл одоогийн УИХ-д “М Си Эс” группээс угшилтай, тус группийг төрд төлөөлдөг, эрх ашгийг нь хамгаалдаг, хамаарал бүхий хэд хэдэн хүн бий. Тухайлбал, УИХ-ын гишүүн Ц.Мөнх-Оргилын эхнэр нь “М Си Эс” группийн үндсэн есөн хувьцаа эзэмшигчийн нэг бөгөөд дэд захирлаар нь ажиллаж ирсэн. Мөн УИХ-ын гишүүн Д.Цогтбаатарын эхнэр нь “М Си Эс” группийн охин компанийн захирал. Харин УИХ-ын гишүүн, БШУ-ны сайд Л.Энх-Амгалан “М Си Эс” группийн үүсгэн байгуулагчдын нэг бөгөөд одоо ч тус группээс санхүүждэг.

  УИХ-ын гишүүн Л.Энх-Амгалан “М СИ ЭС”-ЭЭС САНХҮҮЖИГЧУИХ-ын гишүүн, БШУ-ны сайд Л.Энх-Амгаланг “М Си Эс” групп, “Энержи ресурс” ХХК-аас хэрхэн санхүүжүүлдгийг баримтаар харуулъя. 

   Тодруулбал, Л.Энх-Амгалангийн 2020 оны сонгуулийн сурталчилгаанд 19 компани нийт 380 сая төгрөгийн мөнгөн хандив өгч, сурталчилгааны санхүүжилтийг нь босгожээ. Л.Энх-Амгаланг дэмжиж, сонгуулийн зардлыг нь босголцсон тухайн аж ахуйн нэгжийн олонх нь “М Си Эс” группийн охин компани байгаа юм. Тухайлбал, “М Си Эс” группийн охин компаниуд болох “Эрчим сүлжээ”, “Маркет гейт”, “Агар энержи”, “Юпланет”, “Орбитнет”, “Юнисервис солюшн”, “Белл бий”, “Нордстар ресурс”, “Бьюлдинг Мэйнтэнэнс Сервисэс” ХХК гэсэн нийт есөн компани тус бүр 20 сая төгрөг буюу 180 сая төгрөг хандивласан байдаг. Мөн “Энержи ресурс” ХХК-ийн захирал Готовын Батцэнгэл ч хандив өргөсөн байдаг. Эндээс, УИХ-ын гишүүн Л.Энх-Амгалан хувийн хамгийн том нүүрсний уурхай буюу “Энержи ресурс” ХХК-аас санхүүждэг нь тодорхой харагдаж буй биз ээ.

УИХ-ын гишүүн Д.Цогтбаатар- “М СИ ЭС” ГРУППЭЭС ХУВЬ ХҮРТЭГЧ

    УИХ-ын гишүүн Д.Цогтбаатарын эхнэр Т.Болормаа нь “М Си Эс” группийн харьяа “Интермед” эмнэлгийн Ерөнхий захирлаар ажилладаг. Товчхондоо, Д.Цогтбаатар “М Си Эс” групптэй хувь, хувьсгалын “хэтэвч” нэгтэй хамтрагчид. Цаашилбал, Д.Цогтбаатар өөрөө ч уул уурхайтай, тэр тусмаа нүүрстэй холбогдож явсан үе бий. Тодруулбал, УИХ-ын гишүүн Д.Цогтбаатар, Сү.Батболд нар гадаадад оффшор данстай гэх мэдээлэл 2016 онд задарч байв. Улмаар Д.Цогтбаатар, Сү.Батболд нар зэрэгцэж суугаад, яаран сандран хэвлэлийн хурал хийсэн. Тухайн үед УИХ-ын гишүүн Д.Цогтбаатарыг уул уурхайн ашигт малтмалын, тэр дундаа алт, нүүрсний 187 ширхэг тусгай зөвшөөрөл эзэмшдэг “Бату майнинг” ХХК-тай холбоотой гэх мэдээлэл цацагдаж байв. Харин Д.Цогтбаатар “Австрали найз маань Монголд хамтарч бизнес хийе гэж ярьж байсан. Гадаадын хөрөнгө оруулалттай “Бату майнинг” компани биднийг урьсан. Монголдоо хөрөнгө оруулалт татъя гэж бодсон. Түүнээс биш оффшор данстай нь ямар ч холбоогүй” гэх тайлбар хийгээд өнгөрсөн байдаг. Өөрөөр хэлбэл, УИХ-ын гишүүн Д.Цогтбаатар 187 тусгай зөвшөөрөлтэй “Бату майнинг” ХХК-тай хамтарч, уул уурхайн, тэр тусмаа нүүрсний бизнес эхлүүлэх гэж байв. Өдгөө “Бату майнинг” ХХК-ийг оффшор бүс буюу Их Британийн Виржиний арлуудад бүртгэлтэй “Batu Mining Limited” компани эзэмшдэг. Харин гүйцэтгэх захирлаар нь Сазонов Дмитрий Сергеевич гэгч ажилладаг. 2017 оны нэгдсэн бүртгэлээр “Бату майнинг” ХХК Монгол Улсад алт, нүүрс, газрын ховор элементийн 124 тусгай зөвшөөрөл эзэмшиж байгааг АТГ-ын дарга асан Х.Энхжаргал УИХ-ын Хууль зүйн байнгын хорооны гишүүдэд нэгтгэж танилцуулсан байдаг.

УИХ-ын гишүүн Ц.Мөнх-Оргил- “ЭНЕРЖИ РЕСУРС” ХХК-ИЙН ХУВЬЦАА ГАРГАГЧ

     УИХ-ын гишүүн Ц.Мөнх-Оргилын эхнэр Д.Бадамцэцэг нь “М Си Эс Монголиа” ХХК-ийн үндсэн долоон хувьцаа эзэмшигчийн нэг. Д.Бадамцэцэг “М Си Эс холдинг” ХХК-ийн Хөрөнгө оруулалт хариуцсан захирлаар ажиллаж байхдаа “Энержи ресурс” компанийн IPO-г гаргалцсан том гавьяатай. Дээрээс нь, Ц.Мөнх-Оргил “М Си Эс” группийн Ерөнхийлөгч Ж.Одтой дотно найзууд буюу нийслэлийн 23 дугаар сургуульд 10 жил хамт сурсан, цэрэгт явахдаа нэг ангид, бүр нэг салаанд хуваарилагдсан, хуучнаар ЗХУ-ын Олон улсын харилцааны дээд сургуульд хамт суралцаж төгссөн гээд яг ижил намтартай. Чухамдаа тун дотно найзууд. 

    Эргэн сануулахад, УИХ-ын гишүүн Ц.Мөнх-Оргил 2015 оны ХОМ-тээ “М Си Эс Монголиа” ХХК-д 18 тэрбум төгрөгийн өртэй гэж мэдүүлсэн нь тухайн үедээ шуугиан тарьж байв. Харин Ц.Мөнх-Оргил тэр даруйд нь тайлбар хийж “Манай эхнэр “М Си Эс холдинг” ХХК-аас “Гоёо” ХХК-ийг худалдаж авсан. Гэхдээ төлбөрийнхөө 25 хувийг бэлнээр төлж, 75 хувийг нь зээлээр авсан. Тэр өр миний ХОМ-д дурдагдсан. Гэхдээ “Гоёо” ХХК-ийн 75 хувийг “М Си Эс холдинг” ХХК-д буцаагаад өгчихсөн учраас ямар ч өр төлбөргүй болсон. Манай эхнэр “Гоёо” ХХК-ийн үлдсэн 25 хувийг эзэмшдэг” гэж тайлбарлаж байв.