УИХ-ын чуулганы хуралдаанаар Монгол Улсын хууль тогтоомжийг 2024 он хүртэл боловсронгуй болгох үндсэн чиглэл батлах тухай Улсын Их Хурлын тогтоолын төсөл /Засгийн газар 2020.12.01-ний өдөр өргөн мэдүүлсэн, хэлэлцэх эсэх/-ийг хэлэлцэж байна.

Хуулийн төсөлтэй холбоотой гишүүд асуулт асууж, үг хэлж байна.

УИХ-ын гишүүн С.Амарсайхан:  Асуудлыг дэмжиж байгаа. Хамгийн гол нь хууль батлаад эдийн засагт эерэг өөрчлөлт гардаггүй. Хууль тогтоомжийн хэрэгжилтийн хангахад Засгийн газар чухал үүрэг гүйцэтгэнэ. Дээр нь хууль тогтоомжийг сурталчилах ажил хангалтгүй байна. Хуулийн хэрэгжилтийг журмаар зохицуулдаг. Журам нь маш их хүнд суртал бий болгодгыг би нийслэлийн Засаг даргаар ажиллаж байсан хүний хувьд сайн мэдэж байна. Хэдэн зуун дүрэм журам танай дээр овоолоотой байгааг Х.Нямбаатар сайд та өөрөө мэдэж байгаа. Шат шатанд хуулийн цоорхойг ашигладаг, хууль бус үйлдлүүд илэрч гарч байгаа шүү дээ. Та өөрийгөө өмөөрөх шаардлага байхгүй. Шат шатандаа анхаарах ёстой. Ойлгомжгүй олон хууль гаргаад яах юм бэ. Маш олон хүнийг чирэгдүүлдэг. Журам боловсруулж байна гээд хоёр, гурван сар болдог. Зарчмын асуудалтайгаа нүүр тулж сурцгаая. Бүх зүйл сайхан болж байгаа мэтээр тал засаад яах вэ. Зарчмын асуудалтайгаа нүүр тулж сурцгаая.

УИХ-ын гишүүн Ц.Даваасүрэн: Би дэмжихгүй үг хэлж байгаа юм. Амарсайхан гишүүний хэлсэн үгтэй санал нэг байна. Бид бие биедээ пялдаганаад байж болохгүй. Улс орныхоо хувь заяаг шийдэх хуулийг ярьж байна. Нэг заалтаараа УИХ-ын гишүүн хууль санаачлах эрхтэй, нөгөө хуулиараа хууль санаачлах эрхгүй мэт харагдаад байна.  Үндсэн чиглэлд тусгагдаагүй хуулийг зөвхөн Засгийн газар санаачилна гээд заачихсан. Энэ мэтийг анхаар. Юм юманд эмзэглээд байж болохгүй. Тогтоолын хэрэгжилтэд хяналт тавихыг Засгийн газар анхаарах ёстой гэсэн байна. Ингэж болохгүй. Өнөөдөр маргалдаад байх шаардлагагүй. Бид хэзээ нэг цагт иргэн болно. Иргэн болоход энэ хууль яаж хэрэгжих вэ гэдгийг харж, хуулиа батлах хэрэгтэй. Дөрвөн жилийнхээ явцуу эрх ашгийн төлөө байж болохгүй. Би гурав, дөрвөн жил Оюутолгойн гэрээг дэмжсэнтэй холбоотой баримт бичгийг олж авч чадахгүй байна. Их хурал эрүүл саруул байх ёстой. Энд олон нийтийн дуу хоолой хэрэгтэй. Харилцан ойлголцол хамгийн чухал. Тэгж байж төрийн үйл ажиллагаа тогтвортой явах болно. Бид ард түмний эрх ашигт харшилдаггүй хууль гаргах ёстой. Хэрвээ энэ хуулийг батлах гэж байгаа бол хоёр, гуравдугаар зүйлийг хэлэлцүүлгийн шатанд хасаад явна биз. Хууль  тогтоомжийн хэрэгжилтэд УИХ хяналт тавина. Энэ мэт асуудлаа анхаараад явах нь зүйтэй болов уу.