-УЛСААС ЗЭЭЛ АВСАН БИЗНЕСМЭН, УЛСТӨРЧИД НАСААРАА "ХУЛГАЙЧ" ГЭЖ ЦОЛЛУУЛАХ УУ-

              Нэгэн цагт банкны захирал, ТУЗ-ын дарга гээд мандаж явсан эрхмүүд алга урвуулахын хооронд шоронгийн хаалга татна гэж зүүдлээ ч үгүй биз ээ. Гэвч Хөгжлийн банканд нүүрлэсэн хулгай, тонон дээрэмдсэн төрийн түшээдийн дуулиан өнөөдрийг хүртэл үргэлжилсээр зарим нь яллагдагчаар татагдчихсан, зээлээ яаж төлөх тухай толгойгоо гашилган, байж ядан сууна. Тухайлбал, эрх мэдэл, албан тушаал байдлаа урвуулан ашиглаж, Хөгжлийн банкнаас зээл авч, зориулалтын бусаар ашигласан нэр бүхий зээлдэгч нарыг хуулийн байгууллагаас шалгаж эхэлсэн. Хөгжлийн банкнаас олгосон нийт 75 зээл, 66 зээлдэгчийн зээлийн 55.3 хувь  буюу 1.8 их наяд төгрөг чанаргүй зээлийн ангилалд орсон талаар тус банкнаас мэдээлсэн байдаг. 

       Тиймээс АТГ-аас Хөгжлийн банкнаас зээл олгосон болон авсан нэр бүхий 12 хүнийг саатуулан шалгах саналыг шүүхэд хүргүүлж, хоёрдугаар сарын 18-нд Баянзүрх, Чингэлтэй, Сүхбаатар дүүргийн шүүхээр Хөгжлийн банкны гүйцэтгэх захирал асан Н.Мөнхбат, Б.Батбаяр, ТУЗ-ын дарга асан Б.Шинэбаатар, Ч.Энхбат, Д.Дэлгэрсайхан, Ч.Мөнхбаяр нарыг цагдан хорьсон байдаг. 

       Харин анд нөхөд, хамаатан садандаа ногоон гэрлээр их хэмжээний зээл олгосон 20 гаруй УИХ-ын гишүүний нэр холбогдож, заримыг нь хуулийн байгууллагаас эрчимтэй шалгаж байгаа. Хамгийн сүүлийн үеийн жишээг дурдвал, УИХ-ын гишүүн Г.Амартүвшин Хөгжлийн банкны Гүйцэтгэх захирлаар ажиллаж байхдаа Хас банкны барьцаанд байдаг өөрийн хамаарал бүхий компанидаа Хөгжлийн банкнаас хуурамч бичиг баримтаар хоёр удаа  зээл авсан болох нь хяналт, шалгалтын үеэр илэрсэн гэх. Харин тэрбээр хийсэн гэмээ нуухын тулд гишүүний бүрэн эрхээсээ өөрийн хүсэлтээр түдгэлзэж байгаа тухайгаа цахим хуудсаараа яаралтай мэдэгдэж, шударга гишүүний дүрд хэсэгхэн хугацаанд тоглоод амжсан. 

       АТГ шалгагдаж буй 69 компанийг УИХ-ын дарга Г.Занданшатарын хамаарал бүхий этгээд тэргүүлж буй мэдээлэл бий. Энэ мэтчилсэн хамаарал бүхий этгээддээ улс төрийн нөлөөг ашиглаж зээл авсан гишүүд дор бүрнээ сандралдаж, би авсан, чи авсандаа тулж, эхнээсээ шоронгийн хаалга татах нь тодорхой болчихлоо хэмээн бэмбэгнэж сууна гэхэд хилсдэхгүй. 

          Төр засгаас  иргэдээ “Танд тусалъя, таны бизнесийг дэмжиж, өргөжүүлэхийн тулд бага хувийн хүүтэй зээл олгоё” гээд янз бүрийн сан байгуулж хэдэн тэрбумаар нь зээл олгодог жишээ зөвхөн Хөгжлийн банкаар дуусахгүй. Өмнөх ЖДҮ-гийн асуудал яг л өнөөдрийн Хөгжлийн банкны дуулиан шиг урт гартай улс төрчид нь  хөлжөөд л дуусаж байсныг та санаж байгаа болов уу.  Харин зээл тусламж хэрэгтэй, гэрийнхээ нэг өрөөг ажлын байр болгочихсон, нүхэн гарцын өрөө  түрээсэлж суудаг жижиг дунд бизнес эрхлэгчдэд дэмжлэг болж чадахгүй тэд ч үндэсний үйлдвэрлэл гээд эсгий углааш, тоглоомон хүүхэлдэйгээс давахгүй сууна. Харин жаахан томорчихсон, хэн нэгний нөлөө бүхий хүмүүс зээлээ төлөхгүй байх муу арга сурчихсан байдаг нь нууц биш. Гэхдээ улсаас хэн нэгнийг дэмжих, хэн нэгэнд туслах зорилготой хэдэн тэрбумаар нь зээл олгож, урт гартай улс төрчдийг хооллоод заримыг нь өгөөшөө болгож шоронд хатааж улс төр хийх хэрэг байна уу. 

           Дээрх асуудлууд намжаагүй байтал дахиад л салбар бүрд хөнгөлөлттэй зээлээр туслах тухай хөтөлбөрүүд санаачлаад эхэлчихсэн байна. Тухайлбал, Засгийн газар аялал жуулчлалыг сэргээх зорилгоор аялал жуулчлалын салбарын бизнес эрхлэгчдийн тогтвортой үйл ажиллагааг хангах зорилгоор арван тэрбум төгрөгийн хөнгөлөлттэй зээлийн хөтөлбөр хэрэгжүүлэхээр болсон байна. Энэ мэтчилэн цагаан хоолойгоор тэр сангаас  "Бага хүүтэй зээл аваарай" гээд зарлах нь холгүй байна. Монголын төрөөс зээл авахгүй улстөрч гэж алга. Бүгд зээлийг өөрт ашигтайгаар хэрэглээд сурчихсан. Гэхдээ хэдэн жилийн дараа хэчнээн хүнийг яллах бол гээд таамаглахад ч бэрх байна.

Тиймээс УИХ-ын гишүүд, сайд, дарга нар бодлоготой хандаж, бусдын боломжийг булаахдаа болгоомжтой байхгүй бол ар араасаа шоронгийн хаалга татаад дуусах вий дээ.