Ерөнхий сайдын бяр дуусчихав уу, тэр бярдахыг ч хүсэхгүй муухай аашлаад байна уу. Ямартай ч ааш нь эвдэрчихэж. Энэ зангаараа хүмүүсийг айлгах гэж байгаа бололтой. Уг нь хоёр сарын өмнө хилээ нээж, “шар” түвшинд шилжиж буй сайхан мэдээг бидэнд дуулгачихаад индэр дээрээс инээмсэглээд бууж байлаа. Өнгөрсөн хугацаанд манай улсад төдийгүй дэлхий дахинд чих халууцуулсан олон асуудал өрнөлөө. Энэ ч утгаараа Ерөнхий сайд Л.Оюун-Эрдэнэ үүсээд буй нөхцөл байдлыг ажиглаж, анзаарч байгаад ямар алхам хийвэл зөв болохыг бодож, бодож ямартай ч ээлжит мэдээллээ өчигдөр хийлээ.

    Тэрбээр сэтгүүлчдийн асуусан асуултад хариулт өгөхдөө баахан зовлон тоочиж, тоочиж “Амаргүй байна”  гэх үгийг хэдэнтэй давтав. Тухайлбал, “Орос, Украины асуудлаас болж монголчууд бүтэн сар талцаж байгааг, манай улсын эдийн засаг сэхээний орон дээр байгааг, Хөгжлийн банкны найдваргүй зээлдэгчдийг зарлаж, хууль, хяналтын байгууллагад шилжүүлж, хэний ард хэн байгааг өдрөөс өдөрт мэдэж буй тухай, “сахал” хочит Д.Эрдэнэбилэгийг дэлхийн номер нэгт бичигдэж байсан гэмт хэрэгтэн гэгдэх Эль Чапотой зүйрлэсэн, Х.Баттулгыг зөвлөхөөсөө чөлөөлсөн, Монгол банкны Ерөнхийлөгчийг цээжээрээ хамгаална, албан тушаалд нь санаархагчдыг “Сарвуугаа татаарай, амбицаа татаж сур” хэмээн зандарчихаад, өөрийгөө огцрохоос айхгүй. Харин улстөрийн үхдэл болохоос айж байна” хэмээн бухимдал, бачуурлаа илэрхийлээд амжлаа.

   Мөн Төрийн ордонд хүчин мөхөствөл бүхнийг ил болгочихоод, бүгдтэй нь “унахад” ч бэлэн байгаа гэх санаагаа ч нуусангүй. Харин ч эхний байдлаар өөрийг нь оролдоод байгаа “хорхойнуудад” онцгойлон анхааруулах дохио өгч, чимээгүй болгох шүглээ үлээлээ гэж болохуйц тайлбарыг хөнгөхөн шиг өгчихлөө.

     Яагаад гэвэл, Ерөнхий сайд Хөгжлийн банкны асуудлыг дэлгэж, эрх мэдэлтнүүдийн бухимдлыг төрүүлж, олон жил нуугдаж байсан фракцуудыг хөдөлгөж, олон дайсныг тал бүрээсээ зэрэг дайрах нөхцөлийг бүрдүүлсэн. Өөрөөр хэлбэл, Ерөнхий сайд өөрийнхөө тавьсан хавханд өөрөө орчих гээд их л сандарч байгаа бололтой. Тэгж тэвдэхдээ “Та нар аятайхан байгаарай” хэмээн хажуу хавирганаасаа хазалсан бүхэн рүүгээ “далайж”, энд, тэндэхийн өрөө шагайж явсан залуусыг загнаад, заримыг нь заначихлаа. Ерөнхий сайдыгаа улс төрийн “махчин”, хэрцгий “амьтан” гэж хэлж байгаа юм биш. Харин иймэрхүү үг, үйлдэл үзүүлэхэд нь энэ цагийн асуудлууд нөлөөлсөн нь гарцаагүй болов уу гэж бодож байна. 

    Ерөнхий сайд Л.Оюун-Эрдэнийг зарим нэр нөлөө бүхий хүмүүс, Ерөнхий сайдаар ажиллаж байсан эрхмүүд “Ерөнхий сайдын ажил амаргүй. Яс янгинуулдаг ажил шүү. Энэ цаг үед Ерөнхий сайдаар ажиллах бүр ч амаргүй байгаа даа” хэмээн бичсэн нь түүнийг жигтэйхэн их хөөрхийлж өрөвдөөд ч байх шиг, эсвэл “яадаг билээ” гээд хойдохыг нь уншаад ч байгаа юм шиг янзыг нь үзэв үү гэлтэй.

    Яг үнэндээ ард түмэн Л.Оюун-Эрдэнийг "Ерөнхий сайдынхаа, намынхаа даргын ажлыг хийж чадахгүй байна" хэмээн харж, нөгөө л “огцор” гэдэг бодлогогүй үгээрээ “далайж” байна. Арга ч үгүй юм уу даа, өнөөгийн Монголын эдийн засгийн нөхцөл байдал, үнийн өсөлт, хомсдол, ядуурал гээд бүтэж байгаа юм үнэндээ алга. Тиймээс буруу бүхнийг л Ерөнхий сайд руу чихнэ биз дээ. Үүнээс гадна “Эрдэнэс монгол” ХХК болон Хөгжлийн банктай холбоотой нөхдүүдийн зүгээс ирж буй салхи түүнийг хамчихаж мэдэхээр байгаа учир тэр дараагийн нүүдлээ хэрхэн зэвүүн хийхээр тооцоолж, яаж зангаргатай загнах тухайгаа төлөвлөж, үзэж тарж байгаа биз дээ. Энэ бүхэнд түүртэж, цуцсан Ерөнхий сайд сүүлийн үед ууртай байх шинжтэй шүү, янз нь.