Өнгөрсөн лхагва гарагт Мьянмарын төрийн эргэлтийг эсэргүүцсэн жагсаалд оролцсон 38 хүний амь эрсэджээ. НҮБ энэ тухай “Төрийн эргэлт гарснаас хойш сарын хугацаан дахь хамгийн их “цуст өдөр" болж өнгөрлөө” хэмээн тэмдэглэжээ.

Мьянмарт суугаа НҮБ-ын элч Кристин Бургерен "Жагсаалын тухай цочирдом бичлэгүүд бий" хэмээж, "Цагдаа нар резинэн сумтай буу болон автомат буугаар жагсагчид руу шууд буудаж байна" гэсэн байна.

Нэгэн видео бичлэг дээр цагдаа нар эмнэлгийн багийнхныг зодож, жагсагч руу шууд буудаж буй нь бичигдэн үлджээ.

Аун Сан Су Чи тэргүүтэй төрийн эрх мэдэлтнүүдийг цэргийнхэн хүчээр буулгаж, шоронд хорьсон явдалд жагсагчид сарын турш эсэргүүцлээ илэрхийлж байгаа билээ. Жагсаал эхэлснээс хойш одоогийн байдлаар 50 хүний амь эрсдэж, олон хүн шархдаад байна. Мөн амиа алдсан хүмүүсийн дунд 14,17 настай хөвгүүд байжээ.