Саудын Арабын угсаа залгамжлах хунтайж Мохаммед Бин Салман захиалга өгч “Вашингтон Пост” сонины сэтгүүлч Жамал Хашоггиг хөнөөсөн хэрэг гараад байгаа билээ.

2018 онд сэтгүүлч Жамал Хашогги Саудын Арабын консулын газар руу орсноос хойш ор мөргүй алга болсон юм. Эл явдлыг АНУ-ын тагнуулын газар илчилсэн байсан боловч Мохаммед Бин Салман уг хэрэгт холбогдолгүй хэмээн эсэргүүцсээр байна.

АНУ-ын тагнуулын газар энэ хэргийг эртнээс судалж, хэргийг илчилсэн ч олон нийтэд зарлаагүй нь Ерөнхийлөгч асан Дональд Трамп хамтрагч орныхоо эсрэг мэдэгдэл хийхээс зайлс хийснээс болсон байна. Харин Жо Байдены Засгийн газар уг хэргийг олон нийтэд ил болгов.  

Тэгвэл чөлөөт сэтгүүлчид Герман Улсын шүүхэд “Хүн төрөлхтөнд заналхийлсэн” хэмээн Мохаммед Бин Салманы эсрэг гомдол  гаргажээ.

Карлсруэ хотын холбооны шүүхэд Саудын Арабын сэтгүүлчдийг “системчилсэн” байдлаар хавчлага явуулж, 34 сэтгүүлчийг дур мэдэн хорьж, нэг сэтгүүлчийн аминд хүрсэн гэсэн утгатай 500 гаруй хуудас гомдол ирүүлсэн байна.

/Жамал Хашогги/

Мягмар гарагт болсон хэвлэлийн бага хурлаар “Сэтгүүлчид бэлгийн хүчирхийлэл, албадлага, эрүүдэн шүүлт, хүн амны хэргийн золиос болж байна” хэмээн чөлөөт сэтгүүлчдийн нарийн бичгийн дарга Кристоф Дэлуар хэлжээ.

ХБНГУ-ын хуульд Герман Улсаас хамааралгүйгээр гадаад оронд үйлдэгдсэн олон улсын гэмт хэргийг шүүхэд харьяалал тогтоодог тул энэ хэргийг шийдэж өгнө хэмээн найдаж байгаа аж.

“Саудын Арабын ханхүү сэтгүүлчдэд заналхийлж, хүн төрөлхтний эсрэг гэмт хэрэг үйлдсэн хэргийг албан ёсоор нээвэл дэлхийн хэмжээнд  анхдагч болох болно. Бид албан ёсоор прокуророос энэ хэрэгт дүн шинжилгээ хийхийг хүсэж байна. Мөрдөн байцаалтаа эхлүүлж, баривчлах захирамж гаргах хэрэгтэй” хэмээн чөлөөт сэтгүүлчдийн Герман дахь захирал Кристиан Михр мэдээлэв.

Хохирогч Жамал Хашоггин сүйт бүсгүй Хатиши Зенгиз “Би захиалгат аллага гэдгийг нотлох баримт өгөх болно. Ямар ч үед алуурчныг зугтаалгаж болохгүй. Эс тэгвээс хэрэг ахин давтагдах болно” гэжээ.

АНУ-ын Ерөнхийлөгч Жо Байден “Саудын Арабын ханхүү энэ хэргийг үйлдсэн байсан ч түүнд цааш ямарваа үйлдэл хийхгүй” гэсэн шийдвэрийг эсэргүүцэж байгаа аж. Харин Саудын Арабын зүгээс энэхүү хэргийг үгүйсгэсэн хэвээр байна.

Эх сурвалж: Guardian