Мьянмар Улсын удирдагч Аун Сан Су Чи-г цэргийн хүчнийхэн хорьсон хэмээн мэдээлсний дараа АНУ-ын Ерөнхийлөгч Жо Байден Мьянмар Улсад эдийн засгийн хориг тавихаа анхааруулжээ. Мьянмар Улс ардчилсан нийгэмд шилжихэд буюу 10 жилийн өмнө АНУ хоригоо цуцалж байжээ.

Мьянмарын парламентын сонгуульд Аун Сан Су Чи-гийн намыг үнэмлэхүй ялалт байгуулсны дараа сонгуульд луйвар орсон хэмээн цэргийн хүчнийхэн удирдагчдыг баривчлаад байна. /Мьянмарт болсон баривчилгааны тухай эндээс уншаарай/

Ерөнхийлөгч Жо Байден “Ард түмний хүсэл, зорилго, итгэлцлийн үр дүнг арилгахын тулд хүч ашиглах ёсгүй. “Халдлагад өртөж байсан ч хамаагүй, АНУ ардчиллын төлөө тэмцэнэ” хэмээн мэдээлжээ.

Мөн НҮБ, Их Британи, Европын холбоо энэхүү төрийн эргэлтийг буруушааж байна.

НҮБ-ын Ерөнхий нарийн бичгийн дарга Антонио Гуттерриш Аюулгүй байдлын зөвлөлийн шуурхай хурал зохион байгуулсан төдийгүй “Ардчиллын шинэчлэлд маш том цохилт боллоо” хэмээв. НҮБ-ын мэдээллээр дор хаяж 45 хүнийг баривчилсан бөгөөд тэднийг суллахыг шаарджээ.

 Их Британи Улсын Ерөнхий сайд Борис Жонсон “Төрийн эргэлт хийж, Аун Сан Су Чи-г хууль бусаар шоронд хорьсон” гэж мэдээлжээ. Европын Холбоо ч мөн үүнтэй адил байр суурь баримталж, тэднийг буруушаав. БНХАУ өмнө нь Мьянмар Улсын дотоод хэрэгт оролцохгүй байхыг уриалж байсан бол энэ удаад дотоод зөрчилдөөнөө арилгахыг уриалжээ. Гэвч Камбож, Тайланд тэргүүтэй зарим улс үүнийг “Улсын дотоод хэрэг” гэж харж байна.

Мьянмарт юу болж байна вэ?

Цэргүүд гудамжинд эргүүлд гарч, шөнийн цагаар хөл хорио тогтоож, нэг жилийн хугацаатай онцгой байдал зарлав. Хатагтай Аун Сан Су Чи “Дэмжигчдэдээ энэхүү төрийн эргэлтийг хүлээн зөвшөөрч болохгүй. Цэргийнхний үйл хөдлөл, Мьянмар Улсыг дарангуйллын захиргаанд шилжүүлж магадгүй” гэв. Цэргийнхэн төрд халаа, сэлгээ хийнэ гэдгээ мэдэгдээд байна.

Мьянмарын төв Янгон гудамжинд хүмүүс “Ардчиллын төлөө тэмцэлд бид ялагдлаа” хэмээжээ. Нэрээ нууцлахыг хүссэн 25 настай иргэн “Нэг л өглөө сэрэхэд дэлхий орвонгоороо эргэсэн мэт мэдрэмж анхных биш. Гэвч бид цааш хөгжиж байна гэж бодсон. Энэ мэдрэмжийг ахин мэдэрнэ гэж бодож байсангүй” гэв.