Украин руу цэргүүдээ оруулж, Үндсэн хуульдаа нэмэлт, өөрчлөлт оруулснаасаа хойш дайн тулаан, хүрээллийнх нь урвалтаас эхлүүлээд түүнд олон асуудал гарч ирсэн. Олон улсын эрүүгийн шүүхээс ч ОХУ-ын Ерөнхийлөгч Владимир Путинг дайны гэмт хэрэгт буруутган баривчлах шийдвэр гаргаад байв. Харин В.Путин Кремльд дахин тугаа хатгаснаар байр сууриа улам баталгаажуулж, 20 гаруй жил хашсан төрийн тэргүүний албан тушаалдаа дахин зургаан жил ажиллахаар болсон нь олон улсын шинжээчдийн анхаарлыг татаж байна.

                     ОХУ-ын Ерөнхийлөгчийн сонгуультай холбоотойгоор Украин дахь фронтоосоо хойшлоод байсан орос цэргүүд болон “Вагнер”-ын удирдагч Евгений Пригожин, сөрөг хүчний удирдагч Алексей Навальный нарын үхлийн талаар мэдэгдэлгүй хийгээгүй байсан В.Путин дахин олон нийтийн өмнө гарч ирснээр түүнийг дараагийн нүүдлийн тухай гаднын тоймчид юу гэж бичсэнийг хөрвүүлэн хүргэе.

-ДАЙНЫ ФРОНТ ДАХЬ ЦЭРГҮҮДИЙНХЭЭ ТООГ ҮЛЭМЖ НЭМЭГДҮҮЛЖ, ДАЙНЫГ ЭЦЭС БОЛГОНО ГЭВ-

Тав дахь удаагаа ОХУ-ын Ерөнхийлөгчөөр сонгогдож, 77 нас хүртлээ төрийн эрх барихаар болсон Владимир Путины хамгийн ойрын төлөвлөгөөнүүдийн нэгийг Украин дахь дайны давуу талыг эргүүлэн авч, армийг стратеги төлөвлөгөөг боловсруулах байна гэж шинжээчид үзжээ. Тодруулбал, энэ оны сүүлчээр болох АНУ-ын Ерөнхийлөгчийн сонгуультай холбоотойгоор Украины цэргийн тусламж эргэлзээтэй нөхцөл байдалд байгааг ашиглан ОХУ дайны фронт руу илүү олон цэрэг илгээж, дайны давуу талыг гаргаа атгах, цаашлаад үр дүнд хүргэх магадлалтай гэнэ.

Мөн ОХУ-ын Засгийн газар 2022 оны хоёрдугаар сард Украин руу цэргүүдээ оруулсны дараагаар эдийн засгаа дайны байдалд оруулж, олон талт эдийн засгаа хумисан. Харин Владимир Путин дахин Ерөнхийлөгчөөр сонгогдсон энэ онд цэрэг, армид зориулах зардлаа үлэмж хэмжээгээр нэмэгдүүлэх төлөвтэй байгааг “Capital Economics”-ийн ахлах эдийн засагч Лиам Пич онцолжээ. Тухайлбал, ОХУ-ын Сангийн сайд Антон Силуанов өнгөрсөн 2023 оны намар “ОХУ үндэсний батлан хамгаалах салбарт зарцуулах зардлыг 11 их наяд рубль буюу 117 тэрбум ам.доллар, улсын нийт төсвийн 30 орчим хувийг батлан хамгаалахын чадавхийг бэхжүүлэхэд зориулах төлөвлөгөөтэй байгаа” талаар мэдэгдсэн. Үүнтэй холбоотойгоор Орос дахин цэргийн хүчээ нэмэгдүүлж, фронт руу илгээснээр Украины дайныг шийдэх үйлдлүүдийг хийх аж.

                     Оросын арми сүүлийн хэдэн сарын турш дайны фронтоос ухарч, өөрсдийн мэдэлд авсан Донбассын бүс нутагт байгаа. Харин энэ хугацаанд Украины талаас дайралтаа эрчимжүүлж байсан бөгөөд зэр, зэвсгийн тусламжийн тодорхойгүй шалтгааны улмаас арми нь урагшлах боломжгүй байгааг гаднын зарим эх сурвалж мэдэгдэж буй. Тэгвэл Ерөнхийлөгчийн сонгуулийг хүлээж хэдэн сарын турш чимээгүй байсан ОХУ-ын төрийн тэргүүн Владимир Путин ойрын хугацаанд хийх нүүдлээрээ Украинд шахалт үзүүлж, дайны давуу талыг гартаа оруулахаар ажиллах болно гэжээ.

-ДОТООД ШИНЭЧЛЭЛ БУЮУ ТУНХАГЛАЛ-

ОХУ-ын Ерөнхийлөгчийн сонгуульд үзүүлсэн Владимир Путины илт давуу саналыг гаднын улс төрийн байгууллагууд шүүмжилж, үгүйсгэж байгаа. Үүнтэй холбоотойгоор Оросын сонгуулийг “Шударга бус”, “Эрх чөлөөтэй бус” гэсэн мэдээлэл гарчээ. Харин энэ тухай Кремлийн хэвлэлийн төлөөлөгч Дмитрий Песков “Гаднынхан утгагүй зүйл ярьж байна” хэмээн үгүйсгэсэн бөгөөд Владимир Путины хийхээр төлөвлөж байгаа дотоод реформ, эдийн засгийн бодлого олон шинэ зүйлийг нээх талаар дурдсан аж.

                   Гаднын томоохон хэвлэлийн тоймч, шинжээчид ОХУ-ын Ерөнхийлөгчийн ээлжит сонгуулийг В.Путинд тулгарсан сорилт гэхээсээ илүүтэй бодлого гэж дүгнэжээ. Тухайлбал, Владимир Путины санал Ерөнхийлөгчийн сонгууль тус бүр 2004 онд 71.9 хувь, 2018 онд 76.6 хувь зэргээр дээд амжилт тогтоож байсан бөгөөд энэ удаагийн сонгуульд 87 хувийн саналтайгаар ялалт байгуулсан нь өөрийгөө тунхагласан, ард түмэн дэх байр сууриа дахин баталгаажуулж, итгэлийг нь хүлээсэн явдал болсныг онцолсон байна.

Харин реформын тухайд, ОХУ-ын Ерөнхийлөгч Владимир Путин өнгөрсөн хоёрдугаар сард болсон нэгэн хурал дээр төсвийн зардлын шинэ хөтөлбөр, төсвийн шинэчлэлийн асуудлыг ярьсан бөгөөд ирэх зургаан жилд дэд бүтэц болон нийгмийн салбарт 126 тэрбум ам.доллар зарцуулахаа мэдэгджээ. Ингэснээр ОХУ-д орон сууцны хөнгөлөлттэй зээл, эрүүл мэндийн зэрэг хөтөлбөр идэвхтэй болно гэсэн хүлээлттэй байгаа бөгөөд В.Путины хэрэгжүүлэх реформ Оросын ядуурлыг бууруулж, хүн амын дундаж наслалтыг нэмэгдүүлэх буюу гэр бүл, өрхийг дэмжихэд чиглэсэн шинэ хөтөлбөр байгаа аж. Харин дээр дурдсан цэрэг, армид үзүүлэх төсвөө нэмэгдүүлэхийн тулд дотоод реформ, шинэ эдийн засгийн бодлогыг хойшлуулж, төсвөө хумин, ирэх зургаан жилийнхээ сүүлчээр хэрэгжүүлж эхлэх магадлалтай байгаа юм байна.

-ЗАСГИЙН ГАЗРЫН БҮРЭЛДЭХҮҮНИЙГ ШИНЭЧИЛЖ, "ЗАЛГАМЖЛАГЧ"-ТАЙ БОЛНО ГЭЖЭЭ-

ОХУ-ын Ерөнхийлөгчөөр тав дахиа сонгогдоод байгаа Владимир Путины хэрэгжүүлэх нийгэм, эдийн засгийн хөтөлбөртэй холбоотойгоор Засгийн газрынхаа сайд нарын бүрэлдэхүүнийг өөрчлөх гэнэ. Тухайлбал, ОХУ-ын Засгийн газарт олон жил ажиллаж байгаа В.Путины хамгийн ойрын хүмүүс гэгддэг Батлан хамгаала сайд Сергей Шойгу, Гадаад харилцааны сайд Сергей Лавров нараас бусад сайдыг сольж, шинэ сайдууд томилох өндөр магадлалтай байгаа аж. Хамгийн түрүүнд сайдын тушаалаасаа буух сайдын нэрс дунд Сангийн сайд, Эрүүл мэндийн сайд нарын нэрс байгаа юм.

Мөн Владимир Путин хэрэгжүүлэх реформтойгоо холбоотойгоор өөрийн “залгамжлагч”-ийг гаргах өндөр таамагтай байгаа аж. Тухайлбал, ОХУ-ын Ерөнхийлөгч Владимир Путин “залгамжлагч”-аа Засгийн газрын Сергей Шойгу, Сергей Лавров болон танхимын дарга Михаил Мишустин нараас сонгоно гэсэн таамаглал гараад байгаа ч зарим шинжээч “Биелэх хамгийн магадлал бага таамаг” ч гэж дүгнэсэн байна.