Сүүлийн өдрүүдэд гол усанд осолдох төрлийн дуудлага мэдээлэл нэмэгдэх хандлагатай байгааг Нийслэлийн Онцгой байдлын газраас анхаарууллаа.

Нийслэлийн хэмжээнд он гарсаар Туул голын усанд 5 хүн, 2 хүүхэд осолдож, амиа алджээ. Тодруулбал, өчигдөр буюу долдугаар сарын 26-ны өдөр “...Хан-Уул дүүрэг наймдугаар хороо, Яармагийн гүүрний хойно хүүхэд усанд живж, алга болсон...” гэх дуудлага 18:29 цаг НОБГ-т иржээ. Дуудлагын дагуу НОБГ-ын Аврах ангийн бүрэлдэхүүн эрэн хайх ажиллагааг шуурхай зохион байгуулсан байна. Эрлийн үр дүнд долоо болон 14 настай хоёр хүүхэд осолдож нас барсныг олж, холбогдох байгууллагад хүлээлгэн өгчээ.

АНХААРУУЛГА: Ойрын өдрүүдэд халалт үргэлжилж, зарим үед түр зуурын аадар бороо орохыг ЦУОШГ-аас мэдээлж байна.

Иймд иргэд:

• Бага насны хүүхэдтэй эцэг эх, асран хамгаалагчид өдрийн цагт хүүхэдтэйгээ харилцаа холбоотой байж, анхааруулга сэрэмжүүлгийг өгч хүүхдийнхээ аюулгүй байдлыг хангах,
• Гол мөрөн, нуурын ойролцоо амарч зугаалахдаа ажиглалт хийж, уулын ам, голын ай сав, үерийн буулт бүхий газарт отоглож , хоноглохгүй байх,
• Архи, согтууруулах ундаа хэрэглэсэн үедээ гол, ус руу орохгүй байхыг нийслэлийн Онцгой байдлын газраас анхааруулж байна.